Həsənov Səbuhi Nazim oğlu – 04 may 1985-ci ildə Salyan rayonunda dünyaya gəlmiş, ilk təhsilini doğma torpağında alaraq milli-mənəvi dəyərlərə bağlı bir gənc kimi formalaşmışdır. Uşaqlıqdan qəlbində daşıdığı Vətən sevgisi onun həyat yolunun mayasına çevrilmiş, bu sevgi illər keçdikcə daha da böyüyərək bir amal, bir ideala dönmüşdür.
Orta məktəbi bitirdikdən sonra Vətən qarşısında müqəddəs borcunu yerinə yetirmək üçün hərbi xidmətə yollanmışdır. Xidmət illərində nümunəvi davranışı, intizamı və fədakarlığı ilə seçilmiş, zabitlərin etimadını doğrultmuşdur. Verilən tapşırıqları yüksək məsuliyyətlə icra etmiş, dəfələrlə Fəxri Fərmanlarla təltif olunmuşdur. Bu mükafatlar onun gənc yaşlarından qəlbində daşıdığı Vətən sevgisinin əməli sübutu idi.
Hərbi xidmətini başa vurduqdan sonra təhsilini davam etdirmək məqsədilə Azərbaycan Dövlət Bədən Tərbiyəsi və İdman Akademiyasına qəbul olmuşdur. Akademiyada aldığı biliklər onun həyat yolunda yeni bir mərhələ açmış, ictimai fəallığını daha da gücləndirmişdir. Səbuhi Həsənov gənclik illərindən etibarən milli ideallara bağlılığı, vətənpərvərlik ruhu ilə seçilmiş, müxtəlif tədbirlərdə fəal iştirak etmişdir. Onun həyat fəlsəfəsi sadə, lakin uca bir şüarda cəmlənmişdir: “Vətən sənə canım fəda.”
Hazırda Həsənov Səbuhi Azərbaycan Respublikası Xocalı Soyqırımını Tanıtma İctimai Birliyində sədrin köməkçisi kimi fəaliyyət göstərir. Bu vəzifə ona yalnız təşkilati məsuliyyət deyil, həm də tarixi yaddaşın qorunması, milli faciənin dünyaya tanıdılması kimi müqəddəs bir missiya yükləmişdir. Xocalı soyqırımı – xalqımızın qan yaddaşı, milli kimliyimizin sarsılmaz sütunu, ədalət mübarizəmizin simvoludur. Səbuhi Həsənov bu missiyanın daşıyıcısı olaraq, faciənin unudulmaması və gələcək nəsillərə ötürülməsi üçün yorulmadan çalışır.
Onun həyat yolu bir insanın bioqrafiyası olmaqdan daha çox, bir fəlsəfi dərsdir. Bu dərs bizə öyrədir ki, Vətən sevgisi yalnız duyğu deyil, həm də əməl, fədakarlıq və məsuliyyətdir. Vətənpərvərlik insanı böyüdür, onu xalqına, dövlətinə faydalı bir şəxsiyyətə çevirir. Səbuhi Həsənovun ömrü bu həqiqətin canlı nümunəsidir – böyük ürəkli, fədakar, milli ideallara sadiq bir ziyalı.
Onun adı, fəaliyyəti və həyat yolu bir çağırışdır: hər bir gənc bilməlidir ki, Vətən yalnız torpaq deyil, həm də vicdan, həm də yaddaş, həm də ruhdur. Vətənə həsr olunmuş bir ömür – əslində, insanın özünü aşaraq əbədiyyətə qovuşmasıdır.
Mövsümağa Ədalətoğlu
Yazıçı-publisist
