Novxanı Bələdiyyəsinin sədri Şahin Tağıyevin fəaliyyəti artıq təkcə vətəndaş narazılığı yox, ictimai qalmaqal səviyyəsinə çatıb. Vətəndaşların müraciətlərinə əsasən, bələdiyyə sədri insanları qəbul etmir, kobud davranır və özünü xalqın seçdiyi məmur yox, toxunulmaz bir fiqur kimi aparır.
Bu iddialara aydınlıq gətirmək üçün QanunTV.az Xəbər Portalı olaraq Novxanı kəndinə səfər etdik. Məqsədimiz nə təxribat idi, nə də qərəz. Məqsəd ictimai maraq idi. Amma qarşılaşdığımız mənzərə bir daha sübut etdi ki, problem deyilənlərdən də dərindir.
Şahin Tağıyev vətəndaş narazılığına cavab vermək əvəzinə, məni – Xəbər Portalının rəhbəri Bəxtiyar Vəliyevi kobud şəkildə otağından qovdu və açıq-aşkar dedi:
“Mən Azərbaycanda heç bir media nümayəndəsini saymıram və heç vaxt münasibət bildirməyəcəyəm.”
Daha sonra isə etdiyi hərəkətləri “düz” hesab etdiyini bildirdi.
Bu artıq sadəcə tərbiyəsizlik deyil.
Bu — qanuna, Konstitusiyaya və dövlət başçısının mövqeyinə meydan oxumaqdır.
Azərbaycan Respublikasının Prezidenti İlham Əliyev dəfələrlə açıq şəkildə bəyan edib ki:
ictimai nəzarət güclənməlidir,
media cəmiyyətlə dövlət arasında körpüdür,
media nümayəndələri Prezidentin köməkçiləridir.
Bəs sual yaranır:
Əgər ölkə başçısı medianı öz köməkçisi hesab edirsə, Novxanı Bələdiyyəsinin sədri media nümayəndəsini hansı cəsarətlə təhqir edir və qapıdan qovur?
Bu səlahiyyəti ona kim verib?
Şahin Tağıyev özünü Prezidentin apardığı dövlət siyasətindən yuxarıda görür?
Bu davranış təkcə jurnalistə qarşı deyil, xalqın məlumat almaq hüququna, ictimai nəzarətə və Prezidentin çağırışlarına açıq hörmətsizlikdir.
Əgər bələdiyyə sədrinin fəaliyyəti şəffafdırsa, niyə mediadan qaçır?
Əgər vətəndaşların dedikləri yalandırsa, niyə bir cümlə ilə də olsun cavab vermir?
Yox əgər deyilənlər doğrudursa, bəlkə də qorxu məhz buradan qaynaqlanır.
Bu yazı böhtan deyil.
Bu yazı sifariş deyil.
Bu yazı ictimai ittihamdır və cavab tələb edir.
Aidiyyəti qurumlar – Abşeron Rayon İcra Hakimiyyəti, Azərbaycan Respublikasının Ədliyyə Nazirliyi, Baş Prokurorluq yanında Korrupsiyaya Qarşı Mübarizə Baş İdarəsi bu məsələni nəzarətə götürməlidir.
Çünki bu gün jurnalisti qovan məmur, sabah vətəndaşı da saya salmaz.
Bələdiyyə sədri kreslosu xidmət üçündür, özbaşınalıq və təkəbbür üçün yox.
Mənbə: QanunTV.az
Müəllif: Bəxtiyar Vəliyev
Təsisçi və baş redaktor