Azərbaycan Respublikasının Prezidenti İlham Əliyevin imzaladığı sərəncamla Səbuhi Əhəd oğlu Sadıqov Azərbaycan Respublikasının Dövlət Ehtiyatları Agentliyinin sədri vəzifəsinə təyin edilib.
Yeni təyinatdan sonra Səbuhi Sadıqovun həyat və əmək fəaliyyəti, təhsil yolu və idarəçilik təcrübəsi maraq doğurur.
QanunTV.az Səbuhi Sadıqovun dosyesini təqdim edir.
Səbuhi Əhəd oğlu Sadıqov 1984-cü ildə anadan olub.
O, 2005-ci ildə Azərbaycan Dövlət İqtisad Universitetinin (UNEC) “Maliyyə və kredit” ixtisası üzrə bakalavr təhsilini başa vurub. 2007-ci ildə isə həmin universitetdə magistr dərəcəsi alaraq ali təhsilini fərqlənmə diplomu ilə tamamlayıb.
Peşəkar bilik və bacarıqlarını beynəlxalq standartlar əsasında inkişaf etdirən Səbuhi Sadıqov 2014-cü ildə ABŞ-ın Nyu-Hempşir ştatının İctimai Mühasiblər Heyəti tərəfindən Sertifikatlaşdırılmış İctimai Mühasib (CPA) ixtisas dərəcəsinə layiq görülüb. Bu sertifikat onun maliyyə, audit və mühasibatlıq sahəsində peşəkar hazırlığının mühüm göstəricilərindən biri hesab olunur.
Səbuhi Sadıqov əmək fəaliyyətinə 2005-ci ildə maliyyə-sığorta sektorunda başlayıb. 2007–2018-ci illərdə dünyanın aparıcı audit və konsaltinq şirkətlərindən biri olan “Ernst & Young”da müxtəlif vəzifələrdə çalışıb. Peşəkar fəaliyyəti və iş təcrübəsi nəticəsində şirkətdə baş menecer səviyyəsinədək yüksəlib.
2018–2021-ci illərdə PMD şirkətlər qrupunda Audit departamentinin direktoru vəzifəsində fəaliyyət göstərib. Bununla yanaşı, bir sıra şirkətlərin audit komitələrinin üzvü və sədri kimi də çalışaraq korporativ idarəetmə, maliyyə nəzarəti və audit sahələrində təcrübə qazanıb.
Azərbaycan Respublikası Prezidentinin 2021-ci il 27 dekabr tarixli sərəncamı ilə Səbuhi Sadıqov Azərbaycan Respublikası Dövlət Ehtiyatları Agentliyinin İdarə Heyətinin sədri vəzifəsinə təyin edilib.
O, son təyinatadək Agentliyin rəhbərliyində fəaliyyət göstərib. Prezident İlham Əliyevin yeni sərəncamı ilə isə Dövlət Ehtiyatları Agentliyinin sədri vəzifəsinə gətirilib.
Səbuhi Sadıqovun təhsil və əmək fəaliyyəti maliyyə, beynəlxalq audit, korporativ idarəetmə və dövlət ehtiyatlarının idarə olunması istiqamətlərini əhatə edir. Onun rəhbər vəzifələrdə qazandığı təcrübənin Agentliyin qarşısında duran vəzifələrin icrasında mühüm rol oynayacağı gözlənilir.
Ailəlidir, iki övladı var.
