Son dövrlər İran vətəndaşları və media nümayəndələri tərəfindən Azərbaycan dövlətinin, xalqının və ölkə rəhbərliyinin ünvanına əsassız ittihamların, təhqiramiz ifadələrin və qanunsuz çağırışların səsləndirilməsi halları artıb.

Müxtəlif səviyyəli din xadimləri, parlament üzvləri, ekspertlər və media nümayəndələri tərəfindən Azərbaycanın suverenliyini, milli təhlükəsizliyini, dövlət-din münasibətlərini və idarəçilik sistemini hədəf alan bəyanatların səsləndirildiyi bildirilir. Həmçinin dini radikalizmin təşviq edilməsi, dini zəmində nifrət və düşmənçiliyin qızışdırılması, eləcə də hakimiyyətin zorla dəyişdirilməsinə çağırışlar narahatlıq doğuran hallar kimi qeyd olunur.

QanunTV.az xəbər verir ki, APA-nın məlumatına görə, qeyd olunan hallar nəzərə alınaraq, mediada və sosial şəbəkələrdə Azərbaycana qarşı çağırışlar səsləndirən, düşmənçiliyi təşviq edən 14 İran vətəndaşı Azərbaycan Respublikasının ərazisində “arzuolunmaz şəxs” elan edilib.

Müvafiq qərara əsasən, həmin şəxslərin Azərbaycan ərazisinə daxil olmasına qadağa qoyulub.

“Arzuolunmaz şəxs” elan edilən İran vətəndaşlarının siyahısı belədir:

1. Ehsan Movəhhediyan – siyasi təhlilçi, ekspert, Tehran Əllamə Təbatəbai Universitetinin müəllimi;

2. Əhməd Fərşbafiyan – Təbriz Universiteti nəzdində Qafqaz və Anadolu Araşdırmaları Mərkəzinin keçmiş rəhbəri;

3. Kamran Qəzənfəri – İran İslam Şurası Məclisinin deputatı;

4. Əlirza Beyqi – İran İslam Şurası Məclisinin keçmiş deputatı, siyasi şərhçi;

5. Əbülfəzl Zöhrəvənd – İran İslam Şurası Məclisinin deputatı;

6. Abbas Moqtədayi Xorasqani – İran İslam Şurası Məclisinin deputatı;

7. Əlirza Səlimi – İran İslam Şurası Məclisinin deputatı;

8. Hüseyn Şəriətmədari – “Keyhan” qəzetinin baş redaktoru;

9. Ayətullah Möhsün Əraki – İranda ali rəhbəri seçən Ekspertlər Məclisinin və Məsləhət Şurasının üzvü;

10. Ayətullah Məhəmməd Cavad Fazil Lənkərani – Qum Elmi Hövzəsinin Müəlliflər və Müəllimlər Cəmiyyətinin üzvü, Qum şəhərindəki Əimmeyi-Əthar Fiqh Mərkəzinin rəhbəri;

11. Əbdül Hüseyn Xosrov Pənah – İran Ali Mədəni İnqilab Şurasının katibi;

12. Hüccətül-islam Qulamrza Kavaşi – Təbriz imam-cüməsinin ofisinin ictimaiyyətlə əlaqələr üzrə rəhbəri, İran ali rəhbərinin Şərqi Azərbaycan ostanındakı nümayəndəliyinin ictimaiyyətlə əlaqələr şöbəsinin müdiri;

13. Daryuş Səfərnejad – professor, siyasi ekspert;

14. Əhmədrza Musəvi – aktyor və aparıcı.

Beləliklə, siyahıda İranın siyasi, dini, akademik və media dairələrini təmsil edən şəxslər yer alıb. Onların Azərbaycan ərazisinə girişinə qadağa qoyulması ilə bağlı qərar ölkənin suverenliyinin, milli təhlükəsizliyinin və ictimai sabitliyinin qorunması kontekstində təqdim olunur.