Rusiyalı telejurnalist Aleksey Çadayev Rusiya Nəqliyyat Nazirliyinin ictimai əsaslarla müşaviri vəzifəsindən istefa verib.
Qanuntv.az xəbər verir ki, Çadayev bu barədə özünün “Telegram” kanalında məlumat yayıb.
O bildirib ki, Rusiya nəqliyyat nazirinin ictimai əsaslarla müşaviri kimi səlahiyyətlərini dayandırmaq qərarına gəlib.
Çadayev qeyd edib ki, podkastlarda, sosial şəbəkələrdə və efirlərdə pilotsuz uçuş aparatları, texnoloji suverenlik və bununla bağlı siyasi proseslər barədə səsləndirdiyi fikirlər onun şəxsi ekspert mövqeyidir.
Rusiyalı jurnalistin sözlərinə görə, Rusiya Nəqliyyat Nazirliyi isə dövlət əhəmiyyətli fundamental məsələlərlə məşğuldur. O, xüsusilə “Şimal-Cənub” beynəlxalq nəqliyyat dəhlizinin inkişaf etdirilməsini, fasiləsiz tranzit daşımalarının təmin olunmasını və ölkə iqtisadiyyatı üçün mühüm əhəmiyyət daşıyan digər işlərin həyata keçirilməsini qeyd edib. Çadayev bu fəaliyyətlər sırasında Azərbaycan istiqamətində görülən işlərə də toxunub.
Çadayev istefa qərarını şəxsi mövqelərinin dövlətlərarası münasibətlərə təsir göstərməsinin və dövlətlərin birgə fəaliyyətinə maneə yaratmasının qarşısını almaq istəyi ilə izah edib.
O, qərarında hər hansı dramatik məqam olmadığını bildirərək əsas fəaliyyətinin pilotsuz sistemlər, hərbi-mülki inteqrasiya və digər istiqamətlər üzrə davam edəcəyini qeyd edib.
Aleksey Çadayev Azərbaycan tərəfindən axtarışa verilib
Qeyd edək ki, Aleksey Çadayevin adı Azərbaycanda aparılan cinayət işi çərçivəsində də hallanır.
Azərbaycan Respublikasının Baş Prokurorluğunda konstitusiya quruluşunun zorla dəyişdirilməsinə, ərazi bütövlüyünün parçalanmasına, milli nifrət və düşmənçiliyin salınmasına, habelə terrorçuluğa açıq çağırışlarla bağlı cinayət işi üzrə ibtidai istintaq davam etdirilir.
İstintaq zamanı Rusiya vətəndaşları – “Moskva 24” telekanalının aparıcısı İvan Knyazev, siyasi məsləhətçi və media eksperti Semyon Uralov, həmçinin televiziya jurnalisti və Rusiya Federasiyası nəqliyyat nazirinin müşaviri Aleksey Çadayev barəsində əsaslı şübhələr müəyyən edilib.
Baş Prokurorluğun məlumatına görə, həmin şəxslər iyulun 14-də “YouTube” platformasında “Семён Уралов” adlı kanalda yayımlanan “Чистота понимания” verilişində Azərbaycan Respublikasına qarşı zorakı üsulların tətbiqinə, konstitusiya quruluşunun zorla dəyişdirilməsinə, ərazi bütövlüyünün parçalanmasına, eləcə də milli nifrət və düşmənçiliyin salınmasına yönələn çağırışlarla çıxış ediblər.
Bundan başqa, avqustun 13-də eyni kanalda yayımlanan verilişdə Azərbaycan Respublikasına qarşı zorakı üsullardan istifadə edilməsinə, ayrı-ayrı şəxslərin fiziki məhvetmə təhlükəsi altında saxlanılmasına və ünvanlı şəkildə sıradan çıxarılmasına dair fikirlərin səsləndirildiyi, bununla da terrorçuluğa açıq çağırışların edildiyi müəyyən olunub.
Faktla bağlı Azərbaycan Respublikasının Baş prokuroru tərəfindən Cinayət Məcəlləsinin 214-2-ci (terrorçuluğa açıq çağırışlar), 281.2-ci (dövlət əleyhinə yönələn açıq çağırışlar) və 283.2.1-ci (milli nifrət və düşmənçiliyin salınması) maddələri ilə cinayət işi başlanıb. İbtidai istintaqın aparılması Baş Prokurorluğun İstintaq idarəsinə həvalə olunub.
Toplanmış sübutlar əsasında Semyon Uralov, İvan Knyazev və Aleksey Çadayev qeyd olunan maddələrlə təqsirləndirilən şəxs qismində cəlb ediliblər.
Həmin şəxslər Azərbaycan Respublikasının hüdudlarından kənarda olduqlarından barələrində axtarış elan edilib və məhkəmənin müvafiq qərarları ilə həbs qətimkan tədbiri seçilib.
Beləliklə, Azərbaycan tərəfindən axtarışda olan Aleksey Çadayevin Rusiya Nəqliyyat Nazirliyindəki müşavir vəzifəsindən istefası iki ölkə arasında son dövrdə yaranmış gərgin informasiya fonunda diqqət çəkən hadisələrdən biri olub.
