Şəmkir rayonunda baş verənlər artıq sadəcə narazılıq deyil, açıq şəkildə sosial gərginlik yaradan ciddi problemdir. Rayon ərazisində kifayət qədər bazar olduğu halda, insanların öz rayonunda heyvan alqı-satqısı etməsinə məhdudiyyət qoyulması, sahibkarların sıxışdırılması və kənd adamının dolanışıq imkanlarının əlindən alınması heç bir məntiqə sığmır.
Qazax-Tovuz Qida Təhlükəsizliyi Agentliyi şöbəsinin rəhbərliyi Şəmkir rayonunda sahibkarlara qarşı faktiki olaraq divan tutur. Yerli bazarlarda satışın qarşısı alınır, kənd adamı öz heyvanını öz bazarında sata bilmir, insanlar məcburi şəkildə Gəncə şəhərində yerləşən vasitəçi bazarına yönləndirilir.
Bu nə deməkdir?
Bu o deməkdir ki, Şəmkir sakini öz rayonunda qazanc əldə edə bilmir, bazarlar boşaldılır, yerli ticarət boğulur və sadə vətəndaş bilərəkdən çətin vəziyyətə salınır.
Rayon sakini heyvanını öz bazarında satmaq üçün cəmi 3-5 manat xərc çəkə bildiyi halda, niyə əlavə yol pulu ödəyib Gəncəyə getməlidir? Niyə kənd adamı öz rayonunda yox, başqa şəhərdə vasitəçilərin əlində qalmalıdır?
Bu, açıq şəkildə sosial ədalətsizlikdir!
Hər adamın Gəncəyə getməyə imkanı yoxdur.
İnsanlar ailə dolandırır, kənd təsərrüfatı ilə çörək qazanır. Yol xərci, vaxt itkisi, əlavə yük onların belini daha da bükür. Üstəlik, Gəncədə bazara gedən kəndli birbaşa alıcıya yox, dəllala möhtac qalır. Bu isə qiymətlərin süni şəkildə aşağı salınmasına, kəndlinin ziyana düşməsinə səbəb olur.
Belə çıxır ki, qazanan yenə vasitəçilərdir, itirən isə sadə Şəmkir camaatı!
Bu cür idarəçilik dövlət nəzarəti deyil. Bu, sahibkara qarşı təzyiq, kənd adamına qarşı haqsızlıq və rayon iqtisadiyyatına zərbədir.
Sual yaranır:
• Şəmkirdə bazarlar ola-ola niyə insanlar orada satış edə bilmir?
• Bu məhdudiyyət kimə xidmət edir?
• Rayon sahibkarını sıxışdırmaqla hansı məqsəd güdülür?
• Niyə kəndli öz halal qazancını qazanmaq üçün başqa şəhərə sürgün edilir?
Dövlət qurumlarının vəzifəsi vətəndaşı qorumaq, şərait yaratmaqdır. Amma burada əksinə, vətəndaşın çörəyinə mane olmaq, sahibkarlığı boğmaq, insanları narazı salmaq siyasəti aparılır.
Bu cür addımlar yalnız narazılığı artırır, dövlətə olan inamı sarsıdır və ictimai qəzəbi alovlandırır.
Şəmkir sahibkarları və rayon əhalisi haqlı olaraq tələb edir:
Bu qanunsuz məhdudiyyət dərhal aradan qaldırılsın! İnsanlar öz rayonunda sərbəst şəkildə alqı-satqı edə bilsin! Rayon bazarları boşaldılmasın, kəndlinin qazancı dəllalların cibinə axmasın!
Aidiyyəti qurumlar dərhal bu məsələyə müdaxilə etməli, Qazax-Tovuz Qida Təhlükəsizliyi Agentliyinin Şəmkirdə yaratdığı bu süni problemlərə son qoymalıdır.
Əks halda bu vəziyyət daha da böyüyəcək və məsul şəxslər gec-tez xalq qarşısında cavab verməli olacaq!
