Bu gün Səfərbərlik və Hərbi Xidmətə Çağırış üzrə Dövlət Xidmətinin yaradılmasının 14 ili tamam olur. Dövlət Xidməti 13 fevral 2012-ci il tarixində Azərbaycan Prezidenti, Silahlı Qüvvələrin Ali Baş Komandanı İlham Əliyevin fərmanı ilə təsis edilib və həmin dövrdən etibarən ölkənin hərbi quruculuğuna mühüm töhfələr verir.
Əsas fəaliyyət istiqamətləri
Xidmət vətəndaşların ilkin hərbi qeydiyyata alınması, müddətli həqiqi hərbi xidmətə çağırışın təşkili, gənclərin hərbi-vətənpərvərlik ruhunda tərbiyəsi, həmçinin vətəndaş müraciətlərinin operativ və şəffaf şəkildə həllini təmin edir. Eyni zamanda xidmət, qanunvericilik bazasının təkmilləşdirilməsi, korrupsiyaya qarşı mübarizə, kadr potensialının gücləndirilməsi və maddi-texniki baza ilə təmin olunması sahəsində mühüm uğurlar əldə edib.
2025-ci il ərzində Xidmətin qarşısında duran əsas vəzifələrdən biri Silahlı Qüvvələrin ehtiyat resurslarla komplektləşdirilməsi və çağırışçılarla ehtiyatda olan hərbi vəzifəlilərin döyüş hazırlığının artırılması olub. Bu məqsədlə mütəmadi məşğələlər, təlim toplanışları və biliklərin təkmilləşdirilməsi üzrə tədbirlər keçirilib.
Gənclərin hərbi-vətənpərvərlik tərbiyəsi
Çağırışaqədərki yaşda olan gənclərin hərbi vətənpərvərlik ruhunda yetişdirilməsi Dövlət Xidmətinin prioritet istiqamətlərindən biridir. 2025-ci ildə Sabirabad, Şabran, Şəki, Astara, Lerik, Şəmkir, Göygöl, Ağstafa, Xaçmaz, İmişli və Kürdəmir rayonlarında məktəblilərin iştirakı ilə silsilə görüşlər, hərbi-idman oyunları və seminarlar təşkil edilib. Təhsil müəssisələrində çağırışaqədərki hazırlıq rəhbərləri tərəfindən gənclərə ilkin hərbi biliklərin aşılanması və praktiki vərdişlərin formalaşdırılması məqsədilə nümunəvi dərslər keçirilib.
Rəqəmsallaşma və elektron xidmətlər
Dövlət Xidməti vətəndaşlarla birbaşa təması minimuma endirmək və xidmətlərin operativliyini artırmaq məqsədilə müasir texnologiyalardan geniş istifadə edir. Hazırda Xidmətin təqdim etdiyi 6 növ arayış “MyGov” platforması üzərindən elektron qaydada təqdim olunur.
İlkin hərbi qeydiyyat prosesində tətbiq olunan yeni müddəalar çərçivəsində 15 yaşına çatmış kişi cinsli vətəndaşların qeydiyyatı, tələb olunan sənədlərin aidiyyəti dövlət orqanlarının elektron sistemlərindən alınması və valideynlərlə minimum təmas şəklində həyata keçirilir. Bu yanaşma şəffaflığın artırılmasına və vətəndaş məmnunluğunun təmin olunmasına xidmət edir.
Vətəndaş qəbulları və müraciətlər
2025-ci ildə Xidmət rəisi general-mayor Mürsəl İbrahimov Bakı şəhəri ilə yanaşı Sumqayıt, Şirvan, Lənkəran, Sabirabad, Tərtər, Tovuz, Göygöl, Qax, Ağsu, Naxçıvan, Mingəçevir və Xaçmaz şəhərlərində vətəndaş qəbulları keçirib. Bu qəbullarda 44 şəhid ailəsi və 72 müharibə veteranı olmaqla, ümumilikdə 103 vətəndaş Xidmət aparatında, 298 nəfər isə bölgələrdə qəbul edilib.
Həmçinin vətəndaş müraciətlərinin çevik, obyektiv araşdırılması məqsədilə yaradılan “Çağrı Mərkəzi”nə ötən il ərzində 25 mindən artıq müraciət daxil olub.
Şəffaflıq, intizam və korrupsiyaya qarşı tədbirlər
2025-ci ildə xidmət fəaliyyətində şəffaflığın artırılması və korrupsiya hallarının qarşısının alınması istiqamətində sistemli tədbirlər görülüb. 172 əməkdaş barəsində intizam tənbehi və təşkilati-ştat tədbirləri tətbiq olunub, 9 əməkdaş mənfi əsaslarla ehtiyata buraxılıb və ya əmək müqaviləsinə xitam verilib. Ümumilikdə 44 fakt üzrə 93 nəfər barəsində toplanmış materiallar prosessual qərar üçün Baş Prokurorluğa göndərilib.
Beynəlxalq əməkdaşlıq və sosial dəstək
2025-ci ildə Türkiyə və Özbəkistan nümayəndə heyətləri Xidmətə səfər edib, əməkdaşlıq imkanları müzakirə olunub. Hər zaman olduğu kimi şəhid ailələri və müharibə veteranlarına diqqət göstərilib, 1 İyun – Uşaqların Beynəlxalq Müdafiəsi Günü münasibətilə şəhid övladları üçün tədbir təşkil olunub.
Maddi-texniki təminat və inkişaf
Xidmətin aparatında və yerli struktur bölmələrində işin səmərəliliyini artırmaq məqsədilə yeni kompüter və texniki avadanlıqlar alınıb. Çağırışçıların və hərbi vəzifəlilərin daşınması üçün avtopark yenilənib, avtobus və avtomobillər təmin olunub.
Səfərbərlik və Hərbi Xidmətə Çağırış üzrə Dövlət Xidməti bundan sonra da Prezident İlham Əliyevin etimadını doğrultmaq, ölkənin müdafiə potensialını gücləndirmək və vətəndaş məmnunluğunu təmin etmək məqsədilə fəaliyyətini davam etdirəcək.
