
Azərbaycan Respublikası Müdafiə Nazirliyində yüksək intellektual potensiala malik gənclərin bilik və bacarıqlarından hərbi xidmət dövründə daha səmərəli istifadə olunması məqsədilə həyata keçirilən layihə yeni mərhələyə qədəm qoyub.
Qanuntv.az xəbər verir ki, bu barədə Müdafiə Nazirliyi məlumat yayıb.
Bildirilib ki, layihənin yeni mərhələsində Milli Müdafiə Universitetinin intellektual bölmələrinin əhatə dairəsi genişləndirilib. Belə ki, seçim zamanı yüksək akademik göstəricilərlə yanaşı, informasiya texnologiyaları, kibertəhlükəsizlik, süni intellekt, robototexnika, proqramlaşdırma və digər müasir texnoloji istiqamətlər üzrə peşəkar bilik və bacarıqlar da nəzərə alınacaq.
Eyni zamanda, çağırışçıların elektron müraciətlərinin qəbulu üçün xüsusi portal istifadəyə verilib.
Yeni yanaşmanın əsas məqsədi müasir müdafiə sisteminin artan texnoloji tələblərinə uyğun olaraq xüsusi bilik və səriştələrə malik gənclərin potensialını aidiyyəti fəaliyyət istiqamətləri ilə uzlaşdırmaq, onların peşəkar imkanlarından daha məqsədyönlü istifadə etməkdir.
İntellektual bölmələr modeli çağırışçıların ixtisas profilinin hərbi xidmətin real ehtiyaclarına uyğunlaşdırılmasını nəzərdə tutur. İnformasiya texnologiyaları, kibertəhlükəsizlik və mühəndislik sahələrində üstün hazırlığa malik gənclərin müvafiq struktur bölmələrə cəlb edilməsi onların peşəkar biliklərini hərbi xidmət müddətində praktik fəaliyyətə çevirməyə imkan yaradacaq.
Bununla yanaşı, gənclər xidmət müddətində öz ixtisasları üzrə təcrübə qazanmaq, yeni bacarıqlar əldə etmək və peşəkar inkişaflarını davam etdirmək imkanı əldə edəcəklər.
Qeyd olunub ki, tətbiq edilən model xaricdə təhsil almış gənclərin hərbi xidmətə marağının artmasına, yerli ali təhsil müəssisələrinin tələbələri arasında isə yüksək akademik nəticələrə və peşəkar inkişafa yönəlmiş sağlam rəqabət mühitinin formalaşmasına da töhfə verir.
İntellektual bölmələrə seçim hansı meyarlarla aparılacaq?
Müdafiə Nazirliyinin məlumatına əsasən, müəyyən edilmiş seçim meyarlarından ən azı birinə uyğun gələn çağırışçılar intellektual bölmələrdə xidmətə cəlb oluna bilərlər:
- Dövlət İmtahan Mərkəzinin ali təhsil müəssisələrinə qəbul imtahanlarında bütün ixtisas qrupları üzrə 600 və daha yüksək bal toplamış şəxslər;
- Nazirlər Kabinetinin 2019-cu il 20 may tarixli 229 nömrəli Qərarına uyğun olaraq ali təhsil müəssisələrinə müsabiqədənkənar qəbul olunmuş beynəlxalq və respublika fənn olimpiadalarının, beynəlxalq müsabiqə və yarışların qalibləri;
- Əvvəlki təqvim ilinin nəticələrinə əsasən “Times Higher Education World University Rankings” və ya “Academic Ranking of World Universities” reytinqlərində ilk 500-lükdə yer alan xarici ali təhsil müəssisələrinin bakalavriat və ya magistratura proqramlarının məzunları;
- “Gənclərin xarici ölkələrin nüfuzlu ali təhsil müəssisələrində təhsil almalarına dair Dövlət Proqramı” üzrə təsdiq edilmiş universitet və təhsil proqramlarının məzunları. Bu zaman təhsilin dövlət proqramı və ya şəxsi vəsait hesabına maliyyələşdirilməsi fərq yaratmır;
- İnformasiya texnologiyaları və kibertəhlükəsizlik sahələri üzrə “Advanced” və ya “Expert” səviyyəli nüfuzlu beynəlxalq sertifikatlardan birinə malik şəxslər;
- Robototexnika, insansız sistemlər, süni intellekt, kibertəhlükəsizlik və digər texnoloji istiqamətlər üzrə ölkə və beynəlxalq səviyyəli olimpiada, yarış və müsabiqələrin qalibləri.
Beynəlxalq sertifikatlar, olimpiadalar və müsabiqələrlə bağlı müvafiq siyahılar portalın “Sənədlər” bölməsində yerləşdirilib.
Elektron müraciət necə edilməlidir?
Müdafiə Nazirliyinin tabeliyində müddətli həqiqi hərbi xidmət keçəcək və müəyyən edilmiş seçim meyarlarına uyğun gələn çağırışçılar, eləcə də onların ailə üzvləri Milli Müdafiə Universitetinin rəsmi internet səhifəsi vasitəsilə elektron müraciət edə bilərlər.
Bunun üçün "mmu.edu.az" (https://mmu.edu.az) saytına daxil olaraq “İntellektual bölmələr” bölməsindən istifadə etmək mümkündür.
Ətraflı məlumatı portalın “Sənədlər” bölməsindən əldə etmək, əlavə suallar yarandıqda isə Milli Müdafiə Universitetinin *0811 Çağrı Mərkəzinə müraciət etmək olar. Çağrı Mərkəzi iş günləri saat 09:00-dan 17:30-dək fəaliyyət göstərir.
Beləliklə, layihənin yeni mərhələsi yüksək intellektual və texnoloji potensiala malik gənclərin hərbi xidmət zamanı bilik və bacarıqlarını reallaşdırması, eyni zamanda ölkənin müdafiə sisteminin müasir tələblərinə uyğun mütəxəssis potensialının formalaşdırılması baxımından mühüm imkanlar yaradır.





