
Azərbaycanda internet telekommunikasiya xidməti göstərən operator və provayderlərin uçota alınması qaydalarında dəyişiklik edilib.
QanunTV.az xəbər verir ki, bununla bağlı Azərbaycan Respublikasının Baş naziri Əli Əsədov 2026-cı il noyabrın 13-də 382 nömrəli Qərar imzalayıb.
Qərara əsasən, Azərbaycan Respublikası Nazirlər Kabinetinin 2017-ci il 12 oktyabr tarixli 427 nömrəli Qərarı ilə təsdiq edilmiş “İnternet telekommunikasiya xidməti göstərən operatorların və provayderlərin uçotunun aparılması Qaydası”na bir sıra dəyişikliklər edilib.
Dəyişikliklərə əsasən, internet telekommunikasiya xidməti göstərən operator və provayderlərin uçota alınması zamanı təqdim etməli olduqları məlumatların və sənədlərin siyahısı genişləndirilib.
Belə ki, bundan sonra xidmətin təşkili üçün qurulmuş telekommunikasiya şəbəkəsində istifadə olunan avadanlıqların adı, markası, modeli, seriya nömrəsi, istehsal tarixi və quraşdırıldığı ünvan barədə məlumatları əks etdirən sənədlərin surəti təqdim edilməlidir.
Eyni zamanda, telekommunikasiya şəbəkəsinin strukturu, abonent tutumu, xidmət keyfiyyətinə və dayanıqlılığına nəzarət sistemi, eləcə də ümumistifadəli telekommunikasiya şəbəkəsinə qoşulma barədə məlumatların təqdim edilməsi nəzərdə tutulub.
Qərarla uçot üçün təqdim olunan ərizə formalarına da yeni məlumatlar əlavə edilib. Bunlara operator və provayderin hüquqi ünvanı, fəaliyyət ünvanı, internet informasiya ehtiyatı, fəaliyyət növü, telefon nömrəsi, elektron poçt ünvanı və tətbiq edilən müqavilə nümunəsi daxildir.
Bundan başqa, xidmət göstərilən istifadəçilərin növü – fərdi və ya korporativ, xidmətin satış forması – topdan, pərakəndə və ya yenidən satış, əlaqələndirici şəxsin soyadı, adı, atasının adı, telefon nömrəsi və elektron poçt ünvanı barədə məlumatların da ərizədə göstərilməsi tələb olunur.
Qərara əsasən, uçota alınmaq üçün müraciət edən fiziki və hüquqi şəxslərin ərizələrində FİN kodunun göstərilməsi ilə bağlı müddəa da əlavə edilib.
Sənəddə elektron poçt vasitəsilə göndərilən rəsmi məlumatların təqdim olunması qaydası da dəqiqləşdirilib. Belə ki, aidiyyəti qurum tərəfindən göndərilən məktublar elektron poçt ünvanına daxil olduğu gündən üç iş günü keçdikdən sonra rəsmi qaydada verilmiş hesab olunacaq.
Qərarın sonuncu bəndinə əsasən, yeni texniki sənədlərin təqdim edilməsi ilə bağlı tələblər qərar qüvvəyə mindikdən sonra uçota alınmaq üçün müraciət edən internet telekommunikasiya xidməti göstərən operator və provayderlərə şamil ediləcək.
Qərar imzalandığı tarixdən qüvvəyə minib.




