Rusiyanın Sankt-Peterburq şəhərində qadınlara yardım mərkəzinə sığınan 27 yaşlı qadın keçmiş qeyri-rəsmi həyat yoldaşı tərəfindən xüsusi amansızlıqla qətlə yetirilib.
Hadisə noyabrın 12-də şəhərin Vavilovlar küçəsində, qadınlara yardım mərkəzinin qarşısında baş verib.
Rusiya mediasının məlumatına görə, 28 yaşlı, Azərbaycan əsilli Yaqub Süleymanov qadını mərkəzin girişində gözləyərək ona hücum edib. İstintaqın ilkin məlumatlarına əsasən, şübhəli qadına azı səkkiz bıçaq zərbəsi endirib və onun boğazını kəsib. Ağır xəsarətlər alan qadın xəstəxanaya çatdırılarkən yolda həyatını itirib.
Məlumata görə, mərhum qadın əvvəllər dəfələrlə hüquq-mühafizə orqanlarına müraciət edərək keçmiş həyat yoldaşının onu döydüyünü və zorakılığa məruz qoyduğunu bildirib. Sentyabr ayında isə təhlükəsizliyini təmin etmək məqsədilə ondan uzaqlaşaraq qadınlara yardım mərkəzinə sığınıb.
Lakin Yaqub Süleymanov qadının yerini müəyyənləşdirərək onu tapıb. Hadisədən sonra ərazidən uzaqlaşan şübhəli təxminən yarım kilometr məsafə qət etdikdən sonra 112 xidmətinə zəng edərək törətdiyi cinayət barədə məlumat verib. O, qısa müddət sonra polis əməkdaşları tərəfindən saxlanılıb.
Araşdırma zamanı saxlanılan şəxsin Azərbaycanda anadan olduğu, Rusiya vətəndaşlığı daşıdığı və bir müddət Dağıstanda yaşadığı məlum olub.
Rusiya mediasının yaydığı son məlumatlara əsasən, Sankt-Peterburqun Kalinin Rayon Məhkəməsi Yaqub Süleymanov barəsində həbs qətimkan tədbiri seçib. O, xüsusi amansızlıqla adam öldürməkdə ittiham olunur və 2027-ci il yanvarın 11-dək həbsdə saxlanılacaq.
Qeyd edək ki, qətlə yetirilən qadının beş yaşlı övladı qalıb. Məhkəmədə uşağın gələcək himayəsi məsələsinə də baxılıb və onun müvafiq qurumların himayəsinə verilməsi barədə qərar qəbul edilib.
Hadisə ailədaxili zorakılığın ağır nəticələrini və zorakılığa məruz qalan qadınların təhlükəsizliyinin təmin edilməsinin nə qədər vacib olduğunu bir daha gündəmə gətirib.
