Azərbaycan Respublikasının Prezidenti İlham Əliyev Türkiyə Respublikasının Prezidenti Rəcəb Tayyib Ərdoğanın dəvəti ilə BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyasının (COP31) Liderlər Sammitində iştirak etmək məqsədilə noyabrın 10-da Türkiyəyə səfərə gedib.

Dövlət başçısı İlham Əliyevi və birinci xanım Mehriban Əliyevanı Antalya Beynəlxalq Hava Limanında yüksək səviyyədə qarşılayıblar. Prezidentin şərəfinə hava limanında fəxri qarovul dəstəsi düzülüb.

Azərbaycan Prezidentini və birinci xanımı Türk Dövlətləri Təşkilatının Ağsaqqallar Şurasının sədri Binəli Yıldırım, Ədalət və İnkişaf Partiyası (AK Parti) sədrinin müavini, Türkiyə Böyük Millət Məclisinin üzvü Kürşad Zorlu, Türkiyə Böyük Millət Məclisinin Xarici Əlaqələr Komissiyasının sədri Fuat Oktay, Türkiyə Böyük Millət Məclisinin üzvü Mövlud Çavuşoğlu, Antalya şəhərinin valisi Hulusi Şahin və digər rəsmi şəxslər qarşılayıblar.

Prezident İlham Əliyevin COP31 Liderlər Sammitində iştirakı Azərbaycanın qlobal iqlim gündəliyinə verdiyi önəmin, beynəlxalq əməkdaşlığın genişləndirilməsi və ekoloji problemlərin həlli istiqamətində həyata keçirdiyi siyasətin növbəti nümayişidir.

Azərbaycan və Türkiyə arasında mövcud olan strateji müttəfiqlik münasibətləri fonunda bu səfər iki qardaş ölkənin beynəlxalq platformalarda əməkdaşlığının və qarşılıqlı dəstəyinin əhəmiyyətini bir daha ön plana çıxarır.