Azərbaycan Respublikasının Prezidenti İlham Əliyev noyabrın 7-də işğaldan azad edilmiş Ağdam rayonunda kənd təsərrüfatının inkişafı, aqrar istehsalın genişləndirilməsi və regionun iqtisadi potensialının reallaşdırılması baxımından mühüm əhəmiyyət daşıyan Ağdam Zeytun müəssisəsində yaradılan şəraitlə tanış olub.
Dövlət başçısına müəssisənin fəaliyyəti, həyata keçirilən layihələr, əkin sahələrinin genişləndirilməsi, istehsal imkanları və gələcək inkişaf perspektivləri barədə ətraflı məlumat verilib.
Bildirilib ki, “Aqroinkişaf 2017” MMC tərəfindən 2020-ci ilin dekabr ayından etibarən işğaldan azad olunmuş Ağdam ərazisində genişmiqyaslı aqrar layihənin icrasına başlanılıb. Əvvəlcə ərazilər minalardan və hərbi sursatlardan təmizlənib, daha sonra torpağın hazırlanması, planlaşdırılması və əkin işləri həyata keçirilib. İlkin mərhələdə taxıl əkini aparılıb və taxıl sahələrində hər hektardan 40 sentner məhsuldarlıq əldə edilib.
Hazırda müəssisənin ərazisində 1150 hektar sahədə zeytun bağları salınıb, 700 mindən çox ağac əkilib. Gələcək mərhələlərdə zeytun və badam ağaclarının ümumi sayının 1 milyon 500 minə çatdırılması nəzərdə tutulur. Layihənin tam gücü ilə fəaliyyət göstərməsi nəticəsində ildə 10 min ton zeytun və ya 2 min ton zeytun yağı istehsalı planlaşdırılır.
Bu göstəricilər Ağdamın yalnız kənd təsərrüfatı məhsullarının istehsalı baxımından deyil, həm də ölkənin aqrar-sənaye potensialının gücləndirilməsi istiqamətində mühüm mərkəzlərdən birinə çevrilmək imkanlarını nümayiş etdirir.
Layihə çərçivəsində ərazidə müasir infrastrukturun yaradılması istiqamətində də mühüm işlər görülüb. Müvəqqəti suvarma kanalları çəkilib, 3690 metr uzunluğunda Eyvazxanbəyli-Xaçınçay avtomobil yolu təmir olunub, inzibati və texniki zonalar yaradılıb. Bundan başqa, 10 hektar ərazidə meşə massivi salınıb, əlavə olaraq 50 hektar meşə sahəsinin yaradılması planlaşdırılır. Ərazidə yanacaqdoldurma məntəqəsi və meteostansiya da fəaliyyət göstərir.
Prezident İlham Əliyevə ölkəmizdə qoz istehsalı sənayesinin inkişafı istiqamətində həyata keçirilən layihələr barədə də məlumat verilib.
Qeyd olunub ki, Azərbaycanda qoz idxalının əvəzlənməsi, yerli istehsalın artırılması və ixracyönümlü qoz sənayesinin formalaşdırılması məqsədilə 2017-ci ildən başlayaraq “Aqroinkişaf 2017” MMC tərəfindən Şəki-Oğuz rayonlarının ərazisində 2 min hektardan çox sahədə müasir intensiv salxımlı qoz bağlarının salınması işləri artıq yekunlaşmaq üzrədir.
Xatırladılıb ki, Prezident İlham Əliyev 2022-ci ildə Oğuz rayonunda qozun yuyulması, qurudulması, çeşidlənməsi və qablaşdırılması zavodunun təməlini qoyub. 2025-ci ildə isə müəssisə üçün illik istehsal gücü 10 min ton olan müasir istehsal qurğuları alınıb və istismara verilib.
Toplanmış qoz məhsulları əsasən daxili bazarda satışa çıxarılır, eyni zamanda Türkiyə, Gürcüstan, Rusiya və İtaliya kimi ölkələrə ixrac olunur. Bununla yanaşı, təxminən 1000 hektar ərazidə müasir intensiv badam bağlarının salınması istiqamətində işlər aparılır.
Müəssisənin müasir kənd təsərrüfatı texnikası, damcı suvarma sistemləri, meteostansiyalar, fito-laboratoriya və digər zəruri avadanlıqlarla təchiz edilməsi istehsal prosesinin səmərəliliyinin artırılmasına, məhsul keyfiyyətinin qorunmasına və aqrar fəaliyyətin müasir standartlara uyğun təşkilinə xidmət edir.
Dövlət başçısına, həmçinin “Acınohur Zeytun vadisi” layihəsi çərçivəsində görülən işlər barədə ətraflı məlumat təqdim olunub.
Səfərin sonunda Prezident İlham Əliyev ərazidə zeytun ağacı əkib.
Ağdamda həyata keçirilən bu layihə işğaldan azad edilmiş ərazilərin iqtisadi dirçəlişinin, kənd təsərrüfatının inkişafının və Qarabağda yeni istehsal imkanlarının yaradılmasının bariz nümunələrindən biridir. Belə təşəbbüslər yerli istehsalın genişləndirilməsi, yeni iş yerlərinin açılması, ərzaq təhlükəsizliyinin möhkəmləndirilməsi və Azərbaycanın ixrac potensialının artırılması baxımından xüsusi əhəmiyyət daşıyır.
İşğaldan azad edilmiş torpaqlarda salınan hər yeni bağ, qurulan hər bir istehsal müəssisəsi Böyük Qayıdışın iqtisadi və sosial məzmununu daha da gücləndirir. Ağdamda yaradılan aqrar infrastruktur isə Qarabağın gələcək inkişafında kənd təsərrüfatının mühüm rol oynayacağını bir daha təsdiqləyir.
