8 Noyabr - Zəfər Günü münasibətilə Təbrik
Azərbaycan xalqının tarixində 8 Noyabr xüsusi yerə malik olan, dövlətçilik tariximizin ən mühüm mərhələlərindən birini təşkil edən əlamətdar gündür. Bu gün Azərbaycan Respublikasının ərazi bütövlüyünün bərpa olunduğu, xalqımızın milli ləyaqətinin və tarixi ədalətin təntənə etdiyi gündür.
"Turan Elləri" Diasporaya Dəstək İctimai Birliyi adından Azərbaycan Respublikasının Prezidenti, Silahlı Qüvvələrin Ali Baş Komandanı Cənab İlham Əliyevi, Azərbaycan Dövlətini, Azərbaycan Silahlı Qüvvələrini, bütün xalqımızı və xaricdə yaşayan bütün soydaşlarımızı 8 Noyabr - Zəfər Günü münasibətilə səmimi qəlbdən təbrik edirik!
44 günlük Vətən müharibəsində qazanılmış Zəfər Azərbaycan dövlətinin siyasi iradəsinin, Silahlı Qüvvələrimizin peşəkarlığının və xalqımızın sarsılmaz birliyinin məntiqi nəticəsi olmuşdur. Cənab Prezident İlham Əliyevin qətiyyətli liderliyi və məqsədyönlü siyasəti nəticəsində Azərbaycan beynəlxalq hüquqa əsaslanan haqq işini döyüş meydanında uğurla başa çatdırmış, tarixi ədaləti bərpa etmişdir.
Şuşa şəhərinin azad olunması Vətən müharibəsinin həlledici mərhələsi olmuş, Azərbaycan xalqının milli kimliyinin və mədəni irsinin qorunması baxımından müstəsna əhəmiyyət kəsb etmişdir.
Azərbaycan diasporu üçün 8 Noyabr Zəfəri xüsusi əhəmiyyət daşıyır. Bu Zəfər xaricdə yaşayan hər bir Azərbaycanlının milli qürurunun, özünəinamının və Vətənə bağlılığının daha da möhkəmlənməsinə səbəb olmuş, dünya Azərbaycanlılarının birliyini yeni mərhələyə yüksəltmişdir.
Biz bu əlamətdar günü qeyd edərkən Zəfərin hansı bədəllə qazanıldığını dərin ehtiramla xatırlayırıq. Azərbaycanın ərazi bütövlüyü uğrunda canlarından keçmiş şəhidlərimizin xatirəsi xalqımızın yaddaşında əbədi yaşayacaqdır. Onların ailələrinə, sağlamlıqlarını itirmiş qazilərimizə göstərilən diqqət və qayğı dövlətimizin və cəmiyyətimizin daimi borcudur.
Şəhidlərimizin əziz xatirəsi qarşısında dərin ehtiramla baş əyir, onların fədakarlığını heç zaman unutmayacağımızı bir daha bəyan edirik. Qazilərimizin cəsarəti və dözümü isə xalqımızın qürur mənbəyi olaraq daima uca tutulacaqdır. Onların qəhrəmanlığı Azərbaycanın sabahına yazılmış ən işıqlı səhifədir və bu işıq heç zaman sönməyəcəkdir.
Biz əminik ki, Azərbaycan xalqı Cənab Prezident İlham Əliyevin rəhbərliyi ilə Zəfərlə başlayan inkişaf yolunu uğurla davam etdirəcək, azad olunmuş ərazilərin bərpası və Qarabağın dirçəlişi istiqamətində qarşıya qoyulmuş bütün vəzifələri layiqincə yerinə yetirəcəkdir.
Millətin böyüklüyü sərhədlərinin genişliyi ilə deyil, ruhunun dərinliyi ilə ölçülür. Azərbaycan bu həqiqəti bütün dünyaya bir daha təsdiq etdi. Biz sübut etdik ki, haqqı tapdalana bilən, amma ruhu əyilə bilməyən bir xalqıq. Bu gün Qarabağda dalğalanan bayraq təkcə bir parça deyil, minlərlə şəhidin ruhunun, milyonlarla insanın duasının, bir xalqın əbədi yaşamaq əzminin simvoludur. O bayraq endirilmək üçün deyil, nəsillərə əmanət edilmək üçün qaldırılıb. Və biz o əmanəti göz bəbəyimiz kimi qoruyacağıq!
Mövsümağa Ədalətoğlu
"Turan Elləri" Diasporaya Dəstək İctimai Birliyinin sədri
AJB-nin üzvü
yazıçı-publisist
