Azərbaycan Respublikasının Prezidenti İlham Əliyev və birinci xanım Mehriban Əliyeva noyabrın 6-da Zəngilan şəhərində bir sıra sosial əhəmiyyətli infrastruktur layihələrinin açılışında iştirak ediblər.
Dövlət başçısı və birinci xanım Zəngilan Şəhər Təhsil Kompleksinin açılışını ediblər.
Azərbaycan Prezidentinin 2022-ci ildə imzaladığı müvafiq Sərəncama əsasən, Zəngilan şəhərində 960 şagird yerlik tam orta ümumtəhsil məktəbinin layihələndirilməsi və tikintisinə başlanılıb. 2025-ci ildə layihədə konseptual dəyişiklik edilərək təhsil müəssisəsi Zəngilan Şəhər Təhsil Kompleksi kimi yenidən layihələndirilib və peşəyönümlü tədris müəssisəsi formatına uyğunlaşdırılıb.
Kompleksdə müasir tədris imkanlarının yaradılmasına xüsusi diqqət yetirilib. Burada məktəbəhazırlıq, biologiya, informatika, çağırışaqədərki hazırlıq otaqları, eləcə də “STEAM-STARTERS”, “STEAM-SCIENCE LAB” və “STEAM CHALLENGE” otaqları, robot zonaları və laboratoriyalar yaradılıb.
Təhsil kompleksində şagirdlərin nəzəri biliklərlə yanaşı, praktiki bacarıqlar əldə etmələri üçün dərzi, santexnika çilingəri və elektrik montyoru emalatxanaları da fəaliyyət göstərəcək. Bununla yanaşı, kitabxana, idman və akt zalları, yeməkxana müəllim və şagirdlərin istifadəsinə veriləcək.
Ümumi ərazisi 1,6 hektar olan kompleksin həyətində geniş abadlıq işləri aparılıb. Ərazidə açıq idman meydançası və qaçış zolağı yaradılıb.
Qeyd edək ki, Prezident İlham Əliyevin rəhbərliyi ilə həyata keçirilən təhsil siyasəti çərçivəsində ölkəmizdə təhsil infrastrukturunun yenilənməsi, müasir məktəb binalarının tikintisi və mövcud müəssisələrin əsaslı təmiri istiqamətində mühüm işlər görülür. Bu siyasət işğaldan azad edilmiş ərazilərdə də ardıcıl şəkildə davam etdirilir.
Zəngilan Şəhər Təhsil Kompleksinin istifadəyə verilməsi Böyük Qayıdış prosesinin sosial və humanitar istiqamətlərinin genişləndirilməsi baxımından xüsusi əhəmiyyət daşıyır. Müasir tədris və peşə hazırlığı imkanlarına malik müəssisə doğma torpaqlarına qayıdan ailələrin övladlarının keyfiyyətli təhsil almasına, bilik və bacarıqlarını inkişaf etdirməsinə xidmət edəcək.
Zəngilan şəhərində 160 yerlik körpələr evi-uşaq bağçası da açılıb
Noyabrın 6-da Zəngilan şəhərində 160 yerlik körpələr evi-uşaq bağçasının da açılışı olub.
Məktəbəqədər təhsil müəssisəsi “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın icrası çərçivəsində inşa edilib.
Bağçada uşaqların təlim-tərbiyəsi, asudə vaxtlarının səmərəli təşkili və ilkin bacarıqlarının üzə çıxarılması üçün hərtərəfli şərait yaradılıb. Müəssisədə oyun, yataq, kompüter və tibb otaqları, idman zalı, həmçinin musiqi, rəqs və akt zalları fəaliyyət göstərəcək.
Bağçanın həyətində də abadlıq işləri aparılıb, uşaqların açıq havada təhlükəsiz və rahat istirahəti üçün zəruri şərait yaradılıb.
Zəngilanda həm təhsil kompleksinin, həm də körpələr evi-uşaq bağçasının istifadəyə verilməsi doğma yurda qayıdan ailələrin sosial rifahının yüksəldilməsi, uşaqların təhsil və inkişaf imkanlarının genişləndirilməsi baxımından əlamətdar hadisədir.
Bu layihələr bir daha göstərir ki, Böyük Qayıdış yalnız insanların doğma torpaqlarına köçürülməsi ilə məhdudlaşmır. Məqsəd burada müasir yaşayış mühiti formalaşdırmaq, təhsil, səhiyyə, sosial xidmətlər və digər sahələr üzrə dayanıqlı infrastruktur yaratmaqdır.
