Azərbaycan Respublikasının Prezidenti, Müzəffər Ali Baş Komandan İlham Əliyev Müdafiə Nazirliyinin bir sıra hərbi qulluqçularına ali hərbi rütbələrin verilməsi haqqında Sərəncam imzalayıb.
Dövlət başçısının imzaladığı Sərəncama əsasən, Azərbaycan Respublikası Konstitusiyasının 109-cu maddəsinin 24-cü bəndini rəhbər tutaraq Müdafiə Nazirliyinin bir sıra hərbi qulluqçularına yeni ali hərbi rütbələr verilib.
Sərəncama uyğun olaraq, general-mayor Zaur Zeynalabdul oğlu Rüstəmova “general-leytenant” hərbi rütbəsi verilib.
Bununla yanaşı, polkovnik Elnur Əli oğlu Ələsgərliyə, polkovnik Hikmət Rövşən oğlu Əliyevə və polkovnik Telman Əsgər oğlu Hüseynova “general-mayor” hərbi rütbəsi verilib.
Bu qərar Azərbaycan Ordusunda yüksək peşəkarlığın, hərbi intizamın, məsuliyyətin və xidmət fəaliyyətinin qiymətləndirilməsi baxımından diqqət çəkir. Ali hərbi rütbələrin verilməsi eyni zamanda ölkənin müdafiə qüdrətinin möhkəmləndirilməsi, hərbi idarəetmənin təkmilləşdirilməsi və Silahlı Qüvvələrin qarşısında duran mühüm vəzifələrin uğurla yerinə yetirilməsi istiqamətində həyata keçirilən dövlət siyasətinin tərkib hissəsidir.
Azərbaycan Ordusu Prezident İlham Əliyevin rəhbərliyi və Ali Baş Komandanlığı altında tarixi Zəfərə imza ataraq öz gücünü, döyüş qabiliyyətini və peşəkarlığını bütün dünyaya nümayiş etdirib. Bu gün də ordunun müasir tələblərə uyğun inkişaf etdirilməsi, hərbi qulluqçuların peşəkar hazırlığının artırılması və müdafiə potensialının gücləndirilməsi dövlət siyasətinin prioritet istiqamətlərindəndir.
Qeyd edək ki, ali hərbi rütbələrin verilməsi barədə Sərəncam Azərbaycan Respublikasının Prezidenti İlham Əliyev tərəfindən imzalanıb.
