Azərbaycanın işğaldan azad edilmiş Cəbrayıl rayonu ərazisində Türkiyə-Azərbaycan Beynəlxalq Meşə Təlim və Tinglik Mərkəzi Kompleksi fəaliyyətə başlayıb. İki qardaş ölkənin əməkdaşlığının mühüm nümunəsi olan bu layihə Qarabağın ekoloji bərpası, yaşıllaşdırılması və meşəçilik sahəsində kadr potensialının gücləndirilməsi baxımından xüsusi əhəmiyyət daşıyır.
Kompleks Türkiyə Cümhuriyyətinin Kənd Təsərrüfatı və Meşə Nazirliyinin tabeliyində fəaliyyət göstərən Meşə Təsərrüfatı Baş İdarəsinin dəstəyi ilə inşa edilib. Mərkəzin təməli 2022-ci il oktyabrın 20-də Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın iştirakı ilə qoyulub.
Ümumi sahəsi 11,4 hektar olan kompleksin 12 min 200 kvadratmetrlik hissəsində müxtəlif təyinatlı binalar və infrastruktur yaradılıb. Buraya əsas təlim binası, inzibati mərkəz, istehsal emalatxanası və yetişdirilən tinglərin satışı üçün nəzərdə tutulan xüsusi sahə daxildir. Tinglərin yetişdirilməsi məqsədilə isə 47 min 300 kvadratmetrlik ərazi ayrılıb.
Mərkəzin istehsal imkanları da kifayət qədər genişdir. Belə ki, müəssisə il ərzində 2 milyon ədəd ting yetişdirmək gücünə malikdir. Burada hər il 400 nəfərin iştirakı ilə nəzəri və praktiki meşəçilik təlimlərinin keçirilməsi nəzərdə tutulur. Təlim iştirakçılarının kompleks ərazisində gecələməsi üçün də lazımi şərait yaradılıb.
Bu layihə Azərbaycanın işğaldan azad edilmiş ərazilərində ekoloji tarazlığın bərpasına, meşə fondunun genişləndirilməsinə və yaşıllıq sahələrinin artırılmasına mühüm töhfə verəcək. Eyni zamanda, müasir meşəçilik texnologiyalarının tətbiqi, peşəkar mütəxəssislərin hazırlanması və tingçilik təsərrüfatının inkişafı üçün yeni imkanlar yaradacaq.
Türkiyə-Azərbaycan qardaşlığının real nəticələrindən biri kimi dəyərləndirilən bu kompleks iki ölkə arasında strateji tərəfdaşlığın iqtisadi, ekoloji və sosial sahələrdə də uğurla davam etdiyini nümayiş etdirir.
Qeyd edək ki, Türkiyə Prezidenti Rəcəb Tayyib Ərdoğan noyabrın 8-də Azərbaycana səfəri çərçivəsində Prezident İlham Əliyevlə birgə mətbuata bəyanatlarla çıxış edərkən Cəbrayılda yaradılan bu layihəni iki dövlət arasındakı əməkdaşlığın müasir nümunələrindən biri kimi qiymətləndirib. O, Qarabağın bərpası və inkişafı istiqamətində Türkiyənin Azərbaycana dəstəyini davam etdirəcəyini vurğulayıb.
