Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan noyabrın 8-də Xankəndi şəhərində Zəfər abidəsini ziyarət edərək abidənin önünə əklillər qoyublar.

Dövlət başçılarının bu ziyarəti 8 Noyabr – Zəfər Günü münasibətilə keçirilən tədbirlər çərçivəsində xüsusi əhəmiyyət daşıyır.

Azərbaycan xalqının tarixi Zəfərinin rəmzi olan abidə önündə həyata keçirilən bu ehtiram mərasimi Vətən müharibəsində qazanılmış tarixi Qələbənin, ölkəmizin ərazi bütövlüyü və suverenliyinin bərpası uğrunda göstərilən qəhrəmanlığın və fədakarlığın xatırlanması baxımından mühüm məna kəsb edir.

Azərbaycan və Türkiyə prezidentlərinin birgə ziyarəti iki qardaş ölkə arasındakı sarsılmaz dostluğun, həmrəyliyin və strateji müttəfiqliyin növbəti nümayişi kimi diqqət çəkir.

Zəfər Günü Azərbaycan tarixinin ən şanlı səhifələrindən biri olmaqla, xalqımızın milli birliyinin, iradəsinin və mübarizə əzminin təntənəsidir.