Azərbaycan Respublikasının Prezidenti İlham Əliyev noyabrın 12-də İrlandiyanın paytaxtı Dublində keçirilən Avropa Siyasi Birliyinin 9-cu Zirvə Toplantısı çərçivəsində Ermənistan Respublikasının Baş naziri Nikol Paşinyan ilə görüşüb.
Görüşdə Azərbaycan ilə Ermənistan arasında sülh gündəliyinin irəlilədilməsi, regionda sabitliyin möhkəmləndirilməsi və iki ölkə arasında münasibətlərin normallaşdırılması istiqamətində atılan addımlar ətrafında geniş fikir mübadiləsi aparılıb.
Liderlər 2025-ci il avqustun 8-də keçirilmiş Vaşinqton Sülh Sammitinin nəticələrini və həmin tədbirdə imzalanmış Vaşinqton Birgə Bəyannaməsini əsas götürərək sülh prosesinin növbəti mərhələlərini müzakirə ediblər.
Söhbət zamanı iki ölkə arasında sülhün daha da möhkəmləndirilməsinə xidmət edən praktiki məsələlərə xüsusi diqqət yetirilib. Nəqliyyat və tranzit əlaqələrinin inkişafı, iqtisadi-ticari münasibətlərin genişləndirilməsi, sərhədlərin delimitasiyası və etimad quruculuğu tədbirlərinin həyata keçirilməsi müzakirə olunan əsas mövzular sırasında olub.
Görüşdə Beynəlxalq Sülh və Rifah naminə Tramp Marşrutunun (TRIPP) inkişafı istiqamətində əldə olunmuş irəliləyişlər də nəzərdən keçirilib. Layihənin dəmir yolu və avtomobil yolu komponentlərinin planlaşdırılması və layihələndirilməsi, həmçinin marşrut boyunca tranzit əlaqələrinin gələcək perspektivləri barədə fikir mübadiləsi aparılıb.
Azərbaycan ərazisindən keçməklə yüklərin Ermənistana və Ermənistandan tranzitinin həyata keçirilməsi müsbət hal kimi qiymətləndirilib. Bildirilib ki, ötən ilin noyabr ayından etibarən Azərbaycan ərazisindən Ermənistana ümumilikdə 105 min ton yük daşınıb.
Tərəflər iqtisadi və ticari əlaqələrin daha da inkişaf etdirilməsi imkanlarını, o cümlədən gələcəkdə iki ölkənin elektrik şəbəkələrinin birləşdirilməsi məsələsini də müzakirə ediblər.
Bununla yanaşı, ətraf mühitin mühafizəsi və transsərhəd su ehtiyatlarından birgə istifadə sahəsində əməkdaşlığın əhəmiyyəti vurğulanıb. Transsərhəd çayların idarə olunması üzrə işçi qrupların yaradılması müsbət qarşılanıb.
Görüşün sonunda liderlər sülh prosesində mövcud müsbət dinamikanın qorunmasının, dialoqun davam etdirilməsinin, regionda davamlı sülhün, sabitliyin və rifahın möhkəmləndirilməsinə yönəlmiş səylərin vacibliyini bir daha təsdiqləyiblər.
Qeyd edək ki, Dublində keçirilən bu görüş Azərbaycan-Ermənistan münasibətlərinin normallaşdırılması və regionda uzunmüddətli sülhün təmin olunması istiqamətində aparılan müzakirələrin davamı kimi diqqət çəkir.
