Çində yerli istehsal olan 10 tonluq “CE-25A” elektrik kommersiya təyyarəsi ilk sınaq uçuşunu uğurla başa vurub.
Qanuntv.az xəbər verir ki, noyabrın 14-də Şandun əyalətinin Binçjou şəhərində həyata keçirilən uçuş barədə Çin Kommersiya Təyyarə Korporasiyası (COMAC) məlumat yayıb.
Məlumata görə, iki pilot və bir sınaq mühəndisinin iştirak etdiyi uçuş zamanı təyyarənin bütün texniki göstəriciləri gözlənilən nəticələrə uyğun olub.
COMAC tərəfindən hazırlanan ilk elektrik kommersiya təyyarəsi olan “CE-25A”nın əsasən şəhərlərarası sərnişin daşımalarında istifadəsi nəzərdə tutulur.
19 sərnişin tutumuna malik hava gəmisinin maksimal uçuş çəkisi 10 ton, uçuş məsafəsi isə 400 kilometrdir. Saatda 300 kilometr sürətə çata bilən təyyarənin kreyser uçuş hündürlüyü 2 400 metr təşkil edir.
Bu layihə elektrik aviasiyasının inkişafı istiqamətində Çinin mühüm addımlarından biri kimi qiymətləndirilir.
