Azərbaycan Prezidenti İlham Əliyevin Dublində keçirilən Avropa Siyasi Birliyinin 9-cu Sammitində iştirakı ölkəmizin beynəlxalq əməkdaşlıq əlaqələrinin genişləndirilməsi, Avropa ilə enerji tərəfdaşlığının gücləndirilməsi və regionda davamlı sülhün təmin olunması baxımından mühüm əhəmiyyət daşıyıb.
Qanuntv.az xəbər verir ki, bu barədə “Euronews” nəşrinin Prezident İlham Əliyevin sammit çərçivəsində keçirdiyi görüşlərə və əldə olunan razılaşmalara həsr olunmuş məqaləsində bildirilib.
Sammit çərçivəsində Avropa İttifaqı ilə enerji əməkdaşlığının genişləndirilməsi, Böyük Britaniya ilə strateji tərəfdaşlığın yeni mərhələyə yüksəldilməsi, Ermənistanla sülh prosesinin irəlilədilməsi, eləcə də bir sıra Avropa ölkələri ilə ikitərəfli münasibətlərin inkişafı əsas müzakirə mövzuları olub.
Azərbaycanın Avropanın enerji təhlükəsizliyində artan rolu
Prezident İlham Əliyev sammitdəki çıxışında Azərbaycanın Avropaya enerji tədarükünü artırmaq və şaxələndirmək niyyətində olduğunu vurğulayıb. Hazırda Azərbaycan qazı Avropa İttifaqının 10 üzv dövlətinə çatdırılır.
Dövlət başçısı bildirib ki, Azərbaycanın Avropa İttifaqına qaz ixracı 8 milyard kubmetrdən 13 milyard kubmetrə yüksəlib. Bu göstərici ölkənin ümumi qaz ixracının təxminən yarısını təşkil edir.
Sammit çərçivəsində Avropa İttifaqı Şurasının Prezidenti Antonio Koşta ilə keçirilən görüşdə də enerji əməkdaşlığının perspektivləri, uzunmüddətli qaz müqavilələri və Azərbaycan-Aİ münasibətlərinin gələcək inkişafı müzakirə olunub.
Antonio Koşta Azərbaycanla Avropa İttifaqı arasında yeni saziş üzrə danışıqların bərpasını müsbət qiymətləndirərək əməkdaşlığın hər iki tərəf üçün əhəmiyyətini vurğulayıb.
Energetika sahəsində əməkdaşlıq yalnız təbii qazla məhdudlaşmır. Bərpaolunan enerji mənbələrinin inkişafı və bu sahədə regional layihələrin həyata keçirilməsi də diqqət mərkəzindədir. Azərbaycan, Gürcüstan, Türkiyə və Bolqarıstan arasında yaşıl enerjinin Avropa bazarlarına çatdırılması istiqamətində əldə olunmuş razılaşma bu baxımdan xüsusi əhəmiyyət daşıyır.
Görüşdə, həmçinin Naxçıvan dəmir yolu layihəsi və Asiyanı Cənubi Qafqaz vasitəsilə Avropa ilə birləşdirən Orta Dəhlizin inkişafı məsələləri müzakirə edilib.
Böyük Britaniya ilə strateji tərəfdaşlıq yeni mərhələdə
Sammitin diqqətçəkən hadisələrindən biri Azərbaycanla Böyük Britaniya arasında Strateji Tərəfdaşlıq haqqında Birgə Bəyannamənin imzalanması olub.
Prezident İlham Əliyev və Böyük Britaniyanın Baş naziri Endi Börnhem tərəfindən imzalanan sənəd iki ölkə arasında münasibətlərin daha da genişləndirilməsi üçün yeni imkanlar yaradır.
Razılaşma müdafiə və təhlükəsizlik, ticarət, investisiya, bərpaolunan enerji, infrastruktur, süni intellekt və qabaqcıl texnologiyalar kimi mühüm istiqamətləri əhatə edir.
Tərəflər regional sülh və sabitliyin dəstəklənməsi, təhlükəsizlik sahəsində əməkdaşlığın gücləndirilməsi, qarşılıqlı ticarətin artırılması və özəl sektor arasında investisiya əlaqələrinin genişləndirilməsi barədə razılığa gəliblər.
Orta Dəhlizin inkişafı, nəqliyyat və logistika imkanlarının genişləndirilməsi də sənəddə xüsusi yer tutan məsələlərdəndir.
Ermənistanla sülh prosesi və TRIPP layihəsi müzakirə olunub
Prezident İlham Əliyev sammit çərçivəsində Ermənistanın Baş naziri Nikol Paşinyanla da görüş keçirib.
Görüş zamanı Azərbaycan-Ermənistan münasibətlərinin normallaşdırılması, sülh prosesinin möhkəmləndirilməsi, sərhədlərin delimitasiyası, su ehtiyatlarından istifadə, elektrik şəbəkələrinin birləşdirilməsi və qarşılıqlı etimadın gücləndirilməsi məsələləri müzakirə edilib.
Liderlər, həmçinin Beynəlxalq Sülh və Rifah naminə Tramp Marşrutu (TRIPP) layihəsinin həyata keçirilməsi istiqamətində görülən işləri nəzərdən keçiriblər. Layihənin dəmir yolu və avtomobil yolu komponentlərinin planlaşdırılması da müzakirə mövzusu olub.
Avropa dövlətləri ilə əməkdaşlıq əlaqələri genişlənir
Azərbaycan Prezidenti sammit çərçivəsində Yunanıstanın Baş naziri Kiriakos Mitsotakis ilə də görüşüb. Tərəflər ikitərəfli münasibətlərin inkişafı, Cənub Qaz Dəhlizinin infrastrukturu və Trans-Adriatik Boru Kəmərinin (TAP) perspektivlərini müzakirə ediblər.
Moldova Prezidenti Maya Sandu ilə keçirilən görüşdə isə enerji təhlükəsizliyi, iqtisadi və ticarət əlaqələri, eləcə də kənd təsərrüfatı sahəsində əməkdaşlıq məsələlərinə diqqət yetirilib.
Bundan başqa, İlham Əliyev Bolqarıstanın Baş naziri Rumen Radev və Çexiyanın Baş naziri Andrey Babiş ilə energetika sahəsində fikir mübadiləsi aparıb.
Azərbaycanın beynəlxalq mövqeyinin möhkəmlənməsi baxımından mühüm sammit
Dublində keçirilən görüşlər və müzakirələr Azərbaycanın Avropa dövlətləri ilə çoxşaxəli əməkdaşlığının genişləndirilməsi baxımından diqqətəlayiq nəticələrlə yadda qalıb.
Enerji təhlükəsizliyi, nəqliyyat-logistika əlaqələri, müdafiə və təhlükəsizlik, yaşıl enerji, investisiya imkanları və regional sülh kimi istiqamətlərin vahid diplomatik gündəmdə birləşməsi Azərbaycanın beynəlxalq əməkdaşlıq sistemində artan rolunu nümayiş etdirir.
Sammit çərçivəsində əldə olunan razılaşmalar və aparılan müzakirələr Azərbaycanın Avropa ilə münasibətlərinin gələcək inkişafı, regional iqtisadi əlaqələrin gücləndirilməsi və Cənubi Qafqazda davamlı sülhün təşviqi baxımından mühüm əhəmiyyət daşıyır.
