Bu gün dünyada Ümumdünya Qan Donoru Günü qeyd olunur.

Qanuntv.az xəbər verir ki, bu əlamətdar gün 2005-ci ildə Cenevrədə keçirilən Ümumdünya Səhiyyə Assambleyasının sessiyasında qəbul edilən qərara əsasən təsis edilib.

Tarixin məhz 14 iyuna təsadüf etməsi qan qruplarını kəşf edən, Nobel mükafatı laureatı, avstriyalı alim Karl Landsteinerin doğum günü ilə bağlıdır.

Ümumdünya Qan Donoru Gününün əsas məqsədi heç bir qarşılıq gözləmədən qan verərək insanların həyatını xilas edən donorların fədakarlığını və humanistliyini təqdir etmək, həmçinin cəmiyyətdə könüllü qan donorluğunun təşviqinə diqqət çəkməkdir.

Mütəxəssislər bildirirlər ki, qan donorluğu minlərlə insanın həyatının xilas edilməsində mühüm rol oynayır. Məhz bu səbəbdən qan vermək ən nəcib və humanist əməllərdən biri hesab olunur.

Ümumdünya Qan Donoru Günü münasibətilə bütün könüllü donorlar cəmiyyətə göstərdikləri dəyərli töhfəyə görə minnətdarlıqla yad edilir.