Azərbaycan Prezidenti İlham Əliyev sentyabrın 3-də ATƏT Parlament Assambleyasının prezidenti Pere Joan Pons Sanpietronu qəbul edib.
Görüş zamanı Azərbaycan-Ermənistan münasibətlərində əldə olunan irəliləyişlər və regionda davamlı sülhün təmin edilməsi məsələləri müzakirə olunub.
ATƏT Parlament Assambleyasının prezidenti ATƏT məkanında mövcud münaqişələrdən birinin həll edildiyini və regionda davamlı sülhün təmin olunduğunu qeyd edərək, Azərbaycanla Ermənistan arasında sülh gündəliyində əldə edilən nailiyyətlər münasibətilə Prezident İlham Əliyevi təbrik edib.
Dövlət başçısı təbrikə görə təşəkkürünü bildirib. Prezident İlham Əliyev qeyd edib ki, təxminən 30 il ərzində münaqişənin həllinə məsul olan ATƏT-in Minsk qrupu danışıqlar prosesində hər hansı nəticə əldə edə bilməyib.
Prezident, həmçinin BMT Təhlükəsizlik Şurasının Ermənistan qoşunlarının Azərbaycan ərazisindən dərhal və qeyd-şərtsiz çıxarılmasını tələb edən qətnamələrinin icra olunmadığını diqqətə çatdırıb.
İlham Əliyev bildirib ki, Azərbaycan özü hərbi-siyasi vasitələrlə münaqişəyə son qoyaraq ərazi bütövlüyünü və suverenliyini tam təmin edib.
Görüşdə Azərbaycanın ATƏT Parlament Assambleyası ilə münasibətlərindən və mövcud siyasi dialoqdan məmnunluq ifadə olunub. Eyni zamanda, ATƏT Parlament Assambleyasının gündəliyində ATƏT məkanında yerləşən bütün ölkələrə balanslı münasibətin nümayiş etdirilməsinin vacibliyi vurğulanıb.
Söhbət zamanı mədəniyyətlərarası dialoq məsələsinə də toxunulub. Azərbaycanın bu istiqamətdə rolu və töhfələri yüksək qiymətləndirilib.
ATƏT Parlament Assambleyasının prezidenti Bakıda keçirilən “Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda 4-cü Beynəlxalq Minatəmizləmə Konfransının əhəmiyyətini qeyd edib.
Bildirilib ki, mina problemi ATƏT Parlament Assambleyasının gündəliyində də mühüm məsələlərdən biri kimi müzakirə olunur.
