Dövlət İmtahan Mərkəzi (DİM) 2026-cı il iyulun 5-də keçirilmiş II və III ixtisas qrupları üzrə ali təhsil müəssisələrinə qəbul imtahanının nəticələrini elan edib.
Qanuntv.az xəbər verir ki, imtahanda iştirak edən abituriyentlər öz nəticələri, cavab kartı, cavab vərəqələrinin qrafik təsviri, eləcə də açıq tipli tapşırıqlar üzrə qiymətləndirmə meyarları ilə DİM-in elektron sistemi vasitəsilə tanış ola bilərlər. Nəticələri həmçinin mobil operatorlar (Azercell, Bakcell və Nar) üzərindən imtahana buraxılış vərəqəsində göstərilən kodu 7727 nömrəsinə göndərməklə də öyrənmək mümkündür.
Məlumata əsasən, II və III ixtisas qrupları üzrə imtahanda iştirak etmək üçün ümumilikdə 41 623 abituriyent qeydiyyatdan keçib. Onlardan 1 182 nəfər imtahanda iştirak etməyib. İmtahan qaydalarını pozduqlarına görə 16 nəfər imtahandan xaric olunaraq nəticələri ləğv edilib.
II ixtisas qrupu üzrə maksimal 400 balı Laçın rayon Oğuz tam orta məktəbinin məzunu Paşa Araz oğlu İsbəndiyarlı toplayıb. İmtahanın hər iki mərhələsinin cəminə əsasən isə 690 bal nəticə göstərən Sumqayıt şəhər 35 nömrəli tam orta məktəbinin məzunu Zamin Ramin oğlu Kərimov bu qrup üzrə ən yüksək yekun nəticəyə imza atıb.
III ixtisas qrupu üzrə isə maksimal 400 bal nəticəni üç abituriyent – Sumqayıt şəhəri Təbiət Elmləri Təmayüllü Gimnaziyanın məzunu Əli Musa oğlu Məmmədzadə, Şəmkir rayonunun Kür qəsəbə tam orta məktəbinin məzunu Aydan İxtiyar qızı Məmmədova və Abşeron rayonunun Saray qəsəbə 1 nömrəli tam orta məktəbinin məzunu Orxan Zaur oğlu Mənsimli əldə edib.
Yekun nəticələrə görə isə III ixtisas qrupu üzrə ən yüksək göstərici 689,6 bal toplayan Əli Musa oğlu Məmmədzadə olub.
DİM xatırladıb ki, qəbul imtahanının birinci mərhələsində maksimal 300, ikinci mərhələsində isə 400 bal toplamaq mümkündür və müsabiqə hər iki mərhələdə əldə olunan balların cəminə əsasən aparılır.
İmtahan nəticələri ilə bağlı narazılığı olan abituriyentlər üçün Apellyasiya Komissiyası fəaliyyət göstərəcək. Komissiyaya müraciətlər 20 iyul saat 10:00-dan 22 iyul saat 17:00-dək elektron qaydada qəbul olunacaq. Müraciət zamanı abituriyentlər etiraz etdikləri sualın nömrəsini, müraciətin əsasını və qiymətləndirmə meyarının hansı bəndi üzrə etiraz etdiklərini ətraflı qeyd etməlidirlər.
DİM bir daha abituriyentlərə tövsiyə edib ki, apellyasiya müraciəti etməzdən əvvəl nəticələrini, cavab vərəqlərini və qiymətləndirmə meyarlarını diqqətlə nəzərdən keçirsinlər. Qeyd olunub ki, cavab vərəqlərində təlimata uyğun olmayan şəkildə işarələnmiş cavablarla bağlı müraciətlərə baxılmayacaq.
