Ölkə üzrə avqustun 1-dən 15-dək 11 504 uşağa ümumilikdə 15 893 peyvənd tətbiq olunub.
Qanuntv.az xəbər verir ki, bu barədə Tibbi Ərazi Bölmələrini İdarəetmə Birliyi (TƏBİB) məlumat yayıb.
Bildirilib ki, peyvəndləmə TƏBİB tərəfindən təsdiq edilmiş İmmunizasiya üzrə Tədbirlər Planı çərçivəsində həyata keçirilib.
Plan çərçivəsində ilkin səhiyyə müəssisələrində uşaqların immunizasiya statusu qiymətləndirilir, peyvənddən kənarda qalan və ya immunizasiyası tam olmayan uşaqlar müəyyənləşdirilir. Eyni zamanda valideynlər maarifləndirilir və uşaqların yaşına uyğun peyvəndlərlə immunizasiyasının tamamlanması istiqamətində tədbirlər görülür.
Qeyd edək ki, immunizasiya prosesinə cəlb olunan tibb işçilərinin bilik və bacarıqlarının artırılması məqsədilə iyulun 15-dən 31-dək təlimlər keçirilib. Təlimlərdə 1 435 tibb işçisi iştirak edib.
