“Smart Diaqnostika”nın Tibbi direktoru, dosent, doktor Kəraməddin Yanık laboratoriyanın üçillik fəaliyyəti, xidmət keyfiyyəti və gələcək hədəfləri barədə danışıb.
İlk növbədə, Azərbaycanda səhiyyə sisteminin inkişafını necə qiymətləndirirsiniz?
Azərbaycan səhiyyəsi son illərdə mühüm inkişaf və yenilənmə mərhələsindən keçir. Azərbaycan Respublikasının Prezidenti cənab İlham Əliyevin müdrik və uzaqgörən rəhbərliyi ilə ölkənin səhiyyə infrastrukturu gücləndirilir, müasir tibb müəssisələri yaradılır və əhalinin keyfiyyətli tibbi xidmətlərə çıxış imkanları genişləndirilir.
Eyni zamanda, qardaş Türkiyə Respublikasının Prezidenti cənab Rəcəb Tayyib Ərdoğanın rəhbərliyi ilə səhiyyə sahəsində həyata keçirilən böyük islahatlar bu gün bir çox ölkə üçün nümunə təşkil edir.
Biz də “Smart Diaqnostika” olaraq “Bir millət, iki dövlət” prinsipini əsas götürür, Türkiyənin səhiyyə və laboratoriya sahəsindəki zəngin təcrübəsini Azərbaycan sevgisi ilə birləşdiririk.
Azərbaycanda səhiyyə sisteminin inkişafına, icbari tibbi sığortanın tətbiqinə və laboratoriya xidmətlərinin təkmilləşdirilməsinə verdikləri töhfələrə görə TƏBİB-in və İcbari Tibbi Sığorta üzrə Dövlət Agentliyinin rəhbərliyinə və bütün əməkdaşlarına təşəkkürümüzü bildiririk. Həyata keçirilən islahatlar vətəndaşların daha keyfiyyətli, əlçatan və genişmiqyaslı tibbi xidmətlərdən istifadə etməsinə böyük töhfə verir.
“Smart Diaqnostika”nı oxucularımıza necə təqdim edərdiniz?
“Smart Diaqnostika” regionun ən böyük və ən geniş əhatəli laboratoriyasıdır. Artıq üç ildir ki, Mingəçevir, Bərdə, Ağdaş, Yevlax və Tərtər şəhər və rayonlarında yerləşən dövlət xəstəxanalarının laboratoriyalarını idarə edirik.
Mərkəzi laboratoriyamız və xidmət göstərdiyimiz bütün bölmələr vasitəsilə əhaliyə dəqiq, etibarlı və vaxtında laboratoriya nəticələri təqdim etmək üçün çalışırıq.
Məqsədimiz sadəcə analiz aparmaq deyil. Biz həkimlərin düzgün diaqnoz qoymasına və müvafiq müalicə qərarı verməsinə kömək edən etibarlı laboratoriya nəticələri hazırlayırıq. Çünki hər bir düzgün nəticə düzgün diaqnoza, düzgün diaqnoz isə düzgün müalicəyə aparan mühüm addımdır.
Komandanız neçə nəfərdən ibarətdir?
“Smart Diaqnostika”da ümumilikdə 25 nəfərlik peşəkar və təcrübəli heyət fəaliyyət göstərir. Komandamızın tərkibində yerli mütəxəssislərlə yanaşı, Türkiyədən gəlmiş təcrübəli mütəxəssislər də çalışır.
Türkiyəli mütəxəssislər laboratoriya proseslərinin təkmilləşdirilməsi, əməkdaşların təlimi, keyfiyyətə nəzarət və nəticələrin qiymətləndirilməsi sahələrində komandamıza dəstək göstərirlər.
Yerli əməkdaşlarımızın bölgəni və insanlarımızı yaxından tanıması Türkiyədən gələn mütəxəssislərin bilik və təcrübəsi ilə birləşdikdə güclü, çevik və peşəkar komanda formalaşır.
Bir sözlə, biz Türkiyə təcrübəsini Azərbaycan sevgisi ilə birləşdirərək çalışırıq.
“Smart Diaqnostika”nı digər laboratoriyalardan fərqləndirən əsas xüsusiyyətlər hansılardır?
Əsas üstünlüklərimiz geniş müayinə imkanlarımız, müasir texnoloji infrastrukturumuz, təcrübəli mütəxəssislərimiz və keyfiyyətə verdiyimiz böyük əhəmiyyətdir.
Biz dünyanın aparıcı laboratoriya cihazları və reagent istehsalçıları ilə əməkdaşlıq edirik. Müayinələr müasir cihazlarda, orijinal reagentlərdən və beynəlxalq səviyyədə qəbul olunmuş üsullardan istifadə edilməklə həyata keçirilir.
Laboratoriyamızda biokimya, hormon, hematologiya, koaqulyasiya, immunologiya, mikrobiologiya və molekulyar biologiya da daxil olmaqla bir çox istiqamət üzrə geniş çeşiddə müayinələr aparılır.
Məqsədimiz əvvəllər müəyyən müayinələr üçün böyük şəhərlərə getməli və uzun müddət gözləməli olan vətəndaşlarımızın həmin xidmətlərdən yaşadıqları bölgədə istifadə edə bilmələrini təmin etməkdir.
“Keyfiyyətli laboratoriya nəticəsi” sadə vətəndaş üçün nə deməkdir?
Laboratoriya nəticələri bir çox hallarda həkimin diaqnoz və müalicə qərarının əsasını təşkil edir. Buna görə nəticənin yalnız tez hazır olması kifayət deyil. Nəticə, ilk növbədə, düzgün və etibarlı olmalıdır.
Bunu sadə bir misalla izah etmək olar: Tərəzinin düzgün ölçdüyünə əmin olmaq üçün onu müəyyən aralıqlarla yoxlayırıq. Laboratoriya cihazlarında isə bu yoxlamalar daha dəqiq, ətraflı və hər gün aparılır.
Biz işə başlamazdan əvvəl cihazları, reagentləri və xüsusi nəzarət nümunələrini yoxlayırıq. Nəticənin düzgünlüyünə əmin olmadan pasiyent nəticəsini təsdiq etmirik. Zəruri hallarda nəticələr mütəxəssislərimiz tərəfindən əlavə olaraq nəzərdən keçirilir və klinik baxımdan qiymətləndirilir.
Çünki hər bir nümunənin arxasında sağlamlığı ilə bağlı cavab gözləyən bir insan və onun ailəsi dayanır.
Xarici keyfiyyətə nəzarət nədir və nə üçün vacibdir?
Daxili keyfiyyətə nəzarət laboratoriyanın öz daxilində hər gün apardığı yoxlamalardır. Xarici keyfiyyətə nəzarət zamanı isə laboratoriyaya nəticəsi əvvəlcədən məlum olmayan xüsusi nümunələr göndərilir. Biz həmin nümunələri adi pasiyent nümunəsi kimi müayinə edir və əldə etdiyimiz nəticələri müstəqil beynəlxalq keyfiyyət təşkilatına təqdim edirik.
Bunu laboratoriyanın imtahanı da adlandırmaq olar. Nəticələrimiz eyni müayinəni aparan müxtəlif ölkələrin laboratoriyalarının nəticələri ilə müqayisə edilir və laboratoriyanın dəqiqlik səviyyəsi qiymətləndirilir.
“Smart Diaqnostika” xarici keyfiyyətə nəzarət proqramlarında yüksək səviyyəli nəticələr göstərir. Bu uğur istifadə etdiyimiz cihazların, reagentlərin, metodların və bütövlükdə iş sistemimizin etibarlılığını təsdiq edir.
Beynəlxalq standartlara uyğunluğunuzu necə təmin edirsiniz?
“Smart Diaqnostika” fəaliyyətində beynəlxalq standartların tələblərini əsas götürür. Təşkilatımız ISO 9001 və ISO 13485 beynəlxalq standart sertifikatlarına malikdir.
Lakin bizim üçün keyfiyyət sadəcə divardan asılan sertifikat demək deyil. Keyfiyyət pasiyentdən nümunənin düzgün götürülməsi ilə başlayır. Sonra nümunənin uyğun şəraitdə saxlanılması və daşınması, düzgün cihazda və uyğun üsulla işlənilməsi, nəticənin mütəxəssis tərəfindən qiymətləndirilməsi və təhlükəsiz şəkildə pasiyentə çatdırılması ilə tamamlanır.
Bu prosesin hər bir mərhələsinə nəzarət edir, bütün fəaliyyətləri qeydiyyata alır və iş sistemimizi davamlı şəkildə təkmilləşdiririk.
Region əhalisinə nə demək istərdiniz?
İnsan sağlamlığı böyük məsuliyyətdir. Laboratoriyaya daxil olan hər bir nümunənin arxasında bir insanın, bir ailənin və sağlamlıqla bağlı ümidlərin dayandığını yaxşı anlayırıq. Buna görə də hər bir nümunəyə öz doğmamızın nümunəsi kimi diqqətlə yanaşırıq.
Mingəçevir, Bərdə, Ağdaş, Yevlax və Tərtərdə üç ildir ki, böyük məsuliyyət və fədakarlıqla çalışırıq. Region əhalisinin bizə göstərdiyi etimad bizim üçün ən böyük dəyər və motivasiya mənbəyidir.
İstəyirik ki, vətəndaşlarımız keyfiyyətli laboratoriya xidmətləri almaq üçün uzaq şəhərlərə getməsinlər. Müasir, geniş əhatəli və etibarlı laboratoriya müayinələrindən yaşadıqları bölgədə istifadə edə bilsinlər.
Gələcək üçün əsas hədəfləriniz nələrdir?
Əsas hədəfimiz mövcud müayinə imkanlarımızı daha da genişləndirmək, qabaqcıl texnologiya tələb edən yeni analizləri bölgəmizdə əlçatan etmək və nəticələrin təqdim olunma müddətini daha da yaxşılaşdırmaqdır.
Əməkdaşlarımızın davamlı təliminə xüsusi əhəmiyyət veririk. Türkiyədən gələn mütəxəssislərlə bilik və təcrübə mübadiləsini davam etdirəcəyik. Həkimlərimizlə əməkdaşlığı daha da gücləndirərək laboratoriya nəticələrinin diaqnoz və müalicə prosesinə ən düzgün şəkildə töhfə verməsini təmin etməyi planlaşdırırıq.
“Smart Diaqnostika” olaraq Azərbaycanın səhiyyə sahəsində inkişafına töhfə verməkdən qürur duyuruq. Azərbaycan sevgisi və Türkiyə təcrübəsi ilə insan sağlamlığını hər şeydən üstün tutan etibarlı laboratoriya xidmətləri göstərməyə davam edəcəyik.
