Naxçıvanda yeni doğulan nəvəsini öldürən 1974-cü il təvəllüdlü K.S.-nin məhkəmə prosesi başa çatıb.
QanunTV.az xəbər verir ki, Naxçıvan Muxtar Respublikası Ağır Cinayətlər Məhkəməsində keçirilən prosesdə hadisənin təfərrüatları məlum olub.
Məhkəmə araşdırması zamanı müəyyən edilib ki, K.S.-nin öldürdüyü körpəni onun öz qızı dünyaya gətirib. Cinayətin səbəbinin uşağın nikahdankənar doğulması olduğu bildirilib.
Məlumata görə, körpə Naxçıvan Muxtar Respublikası Perinatal Mərkəzində doğulub. Uşaq evə aparılarkən avtomobildə K.S. tərəfindən boğularaq öldürülüb.
Qadının körpənin səsinin eşidilməməsi üçün avtomobilin sürücüsündən maqnitofonun səsini artırmasını istədiyi müəyyən edilib.
K.S. daha sonra körpənin meyitini kənddəki yardımçı tikilidə gizlədib, daha sonra isə həyətində yerləşən tualet quyusuna atıb.
Məhkəmədə K.S. törətdiyi əməli el içində rüsvay olmamaq istəyi ilə izah edib.
Məhkəmənin hökmü ilə K.S. Azərbaycan Respublikası Cinayət Məcəlləsinin 120.2.9-cu maddəsi ilə təqsirli bilinib və 14 il müddətinə azadlıqdan məhrum edilib.
