Prezident İlham Əliyev 15 yaşınadək oğlanlar arasında futbol üzrə ilk dünya çempionatı və festivalının keçirilməsi ilə əlaqədar Azərbaycana gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında Sərəncam imzalayıb.
Qanuntv.az xəbər verir ki, Sərəncama əsasən, FIFA U-15 Dünya çempionatı və festivalı ilə əlaqədar Azərbaycana səfər edən əcnəbilər və vətəndaşlığı olmayan şəxslər 2026-cı il sentyabrın 22-dən noyabrın 5-dək ölkənin beynəlxalq hava limanlarında viza ala biləcəklər.
Viza verilməsi üçün aşağıdakı sənədlərdən hər hansı birinin təqdim edilməsi əsas hesab olunur:
- Azərbaycan Futbol Federasiyaları Assosiasiyasının (AFFA) rəsmi dəvət məktubu;
- Beynəlxalq Futbol Federasiyaları Assosiasiyasının (FIFA) müvafiq qaydalarına uyğun olaraq elektron qeydiyyat sistemi vasitəsilə akkreditasiyadan keçməni təsdiq edən sənəd.
Sərəncamla Xarici İşlər Nazirliyinə viza prosedurlarının sadələşdirilməsi barədə FIFA-ya, Beynəlxalq Hava Nəqliyyatı Assosiasiyasına və xarici ölkələrin müvafiq orqanlarına məlumat vermək tapşırılıb.
Həmçinin, viza prosedurları və “ASAN Viza” sistemi vasitəsilə elektron viza əldə etmək imkanları barədə məlumatların Xarici İşlər Nazirliyinin, eləcə də Azərbaycanın xarici ölkələrdəki səfirlik və konsulluqlarının internet resurslarında yerləşdirilməsi təmin edilməlidir.
Bununla yanaşı, Dövlət Miqrasiya Xidmətinə Azərbaycana uçuşlar həyata keçirən aviasiya şirkətlərini viza prosedurlarının sadələşdirilməsi barədə məlumatlandırmaq tapşırılıb.
Qeyd edək ki, imzalanan Sərəncam FIFA U-15 Dünya çempionatı və festivalı ilə əlaqədar Azərbaycana gələcək xarici iştirakçılar və digər şəxslər üçün viza prosedurlarının asanlaşdırılmasını nəzərdə tutur.
