Bakıda Heydər Əliyev Beynəlxalq Hava Limanının avtodayanacağında tapdığı 20 min ABŞ dollarını mənimsəyən şəxs barəsində hökm çıxarılıb.
QanunTV.az xəbər verir ki, məhkəmə araşdırması zamanı hadisənin 2025-ci il noyabrın 7-də baş verdiyi müəyyən edilib.
Məlumata görə, təqsirləndirilən şəxs icarəyə götürdüyü “Ford Fusion” markalı avtomobillə taksi fəaliyyəti göstərib və hava limanının avtodayanacağında müştəri gözləyib. Həmin vaxt İstanbul-Bakı aviareysi ilə Azərbaycana gələn İ.R. də sifariş etdiyi taksini gözləyib.
Bu zaman İ.R.-nin çantasından içərisində 20 min ABŞ dolları olan sellofan paket yerə düşüb. Qadın bunu hiss etmədən ərazidən uzaqlaşıb.
Bir müddət sonra təqsirləndirilən şəxs yerdə sellofan paket görüb. Paketi götürərək içərisində pul olduğunu müəyyənləşdirsə də, vəsaiti polisə və ya digər aidiyyəti dövlət qurumlarına təhvil verməyib.
Məhkəmədə təqsirləndirilən şəxs ittihamı qəbul etməyib. O, hava limanında yerdə sellofan torba gördüyünü, torbanın içərisində və ətrafında dollar əskinaslarının olduğunu bildirib.
Onun sözlərinə görə, pulları götürdükdən təxminən 20 dəqiqə sonra hava limanını tərk edib. Daha sonra vəsaiti sayaraq məbləğin 20 min ABŞ dolları olduğunu müəyyənləşdirib. Təxminən üç gün ərzində pulu avtomobildə saxlayan şəxs sonradan həmin vəsaiti hissə-hissə xərcləməyə başlayıb.
Məhkəmədə verilən ifadəyə əsasən, pulun bir hissəsi əvvəlki borcların ödənilməsinə, avtomobilin təmirinə, anasının müalicəsinə və digər xərclərə sərf olunub. O, həmçinin vəsaitin təxminən 3 min manatını ehtiyacı olan şəxslərə və dilənçilərə verdiyini bildirib.
Zərərçəkmiş İ.R. isə 20 min ABŞ dollarını mənzilinin satışından əldə etdiyini və övladları üçün saxladığını deyib. Onun sözlərinə görə, həmin vəsaiti ticarət məqsədilə Türkiyəyə aparıb, lakin istifadə etməyib və noyabrın 7-də İstanbul-Bakı reysi ilə Azərbaycana qayıdıb.
İ.R. pul vəsaitini hava limanında qanuni qaydada bəyan etdiyini bildirib. Daha sonra avtodayanacaqda içərisində pul olan sellofan paketin yerə düşdüyünü bilməyib.
Pulun itdiyini evə çatdıqdan sonra müəyyən edən qadın yenidən hava limanına qayıdıb və Daxili İşlər Nazirliyinin “102” xidmətinə məlumat verib.
Araşdırma zamanı hava limanındakı təhlükəsizlik kameralarının görüntüləri araşdırılıb və sellofan paketi götürən şəxsin kimliyi müəyyən edilib.
Məhkəmədə zərərçəkmiş şəxsə dəymiş ziyanın 15 min 500 manatının ödənildiyi bildirilib. İ.R. təqsirləndirilən şəxsdən şikayətçi olmadığını, lakin dəymiş ziyanın tam ödənilməsini tələb etdiyini deyib.
Məhkəmənin hökmü ilə təqsirləndirilən şəxs Cinayət Məcəlləsinin 177.2.4-cü maddəsi ilə təqsirli bilinib.
Ona 2 il müddətinə azadlıqdan məhrum etmə cəzası təyin edilib.
