Bu gün Azərbaycanda dövlət mühafizəsi sahəsində çalışan əməkdaşların peşə bayramı qeyd olunur.
Qanuntv.az xatırladır ki, 1993-cü il avqustun 23-də ümummilli lider Heydər Əliyevin müvafiq Fərmanı ilə Ali Dövlət Hakimiyyət və İdarəetmə Orqanları Baş Mühafizə İdarəsi yaradılıb. Bununla da avqustun 23-ü ölkəmizdə dövlət mühafizəsi sahəsində çalışan əməkdaşların peşə bayramı kimi qeyd olunmağa başlayıb.
Ulu öndər Heydər Əliyevin dövlət mühafizə sisteminin formalaşdırılması və inkişafı ilə bağlı siyasəti Prezident İlham Əliyev tərəfindən uğurla davam etdirilib. Bu siyasətin nəticəsində mühafizə sahəsində idarəetmə və fəaliyyət mexanizmləri müasir tələblərə uyğun şəkildə təkmilləşdirilib.
2020-ci il martın 16-da imzalanan “Xüsusi dövlət mühafizəsi sahəsində idarəetmənin təkmilləşdirilməsi haqqında” Prezident Fərmanı bu istiqamətdə mühüm addımlardan biri olub. Fərmana əsasən, Xüsusi Dövlət Mühafizə Xidmətinin əsasında üç dövlət orqanı – Azərbaycan Respublikası Prezidentinin Təhlükəsizlik Xidməti, Xüsusi Rabitə və İnformasiya Təhlükəsizliyi Dövlət Xidməti və Strateji Obyektlərin Mühafizəsi Dövlət Agentliyi yaradılıb.
Dövlət mühafizəsi sistemində xidmət edən şəxsi heyət ölkənin təhlükəsizliyinin, ərazi bütövlüyünün və ictimai-siyasi sabitliyinin qorunması, mümkün terror aktları və digər təxribatların qarşısının alınması istiqamətində mühüm vəzifələr həyata keçirir. Vətən müharibəsi zamanı da bu sahədə xidmət edən hərbçilərin peşəkarlığı və fədakarlığı bir daha özünü göstərib.
2025-ci il avqustun 29-da imzalanan Azərbaycan Respublikası Prezidentinin 491 nömrəli Fərmanı ilə Azərbaycan Respublikası Prezidentinin Təhlükəsizlik Xidmətinin adı dəyişdirilərək Azərbaycan Respublikası Dövlət Mühafizə Xidməti adlandırılıb.
Dövlət mühafizə sisteminin tarixində Birinci Qarabağ müharibəsinin də xüsusi yeri var. Həmin dövrdə şəxsi heyətdən 13 nəfər şəhid olub, 21 nəfər itkin düşüb, 55 nəfər isə ağır yaralanıb.
Milli Qvardiyanın alay komandiri Əfqan Hüseynov göstərdiyi igidliyə görə ölümündən sonra “Azərbaycanın Milli Qəhrəmanı” adına layiq görülüb. Onun xatirəsinin əbədiləşdirilməsi məqsədilə ucaldılan büstün açılış mərasimində ümummilli lider Heydər Əliyev şəxsən iştirak edib.
Qanuntv.az olaraq dövlət mühafizəsi sahəsində çalışan bütün əməkdaşları peşə bayramı münasibətilə təbrik edir, onlara şərəfli xidmətlərində uğurlar və möhkəm cansağlığı arzulayırıq.
