Xızı rayonunun Şuraabad kəndində vəziyyət kritik həddə çatıb. Sakinlər artıq uzun illərdir ki, məişət tullantıları ilə dolu küçələrdə, su kanalları və həyətlərin ətrafında çirkab içində yaşamağa məcburdur. Bu problem təkcə ətraf mühitin çirklənməsi ilə bağlı deyil, həm də insan sağlamlığı üçün ciddi təhlükə yaradır.
Şuraabad kənd sakinləri Qanuntv.az-a bildiriblər ki, bələdiyyə sədrinin üzünü belə görməyiblər. “Biz bələdiyyə sədrinin nə vaxt kəndə gələcəyini bilmirik. Nə vaxt yaxınlaşsaqda deyirlər ki, başqa yerdədir. Artıq səbrimiz tükənib”, – deyə sakinlər şikayət edirlər. Onlar həmçinin qeyd edirlər ki, bələdiyyənin nümayəndələri ilə heç bir görüş keçirilməyib və problemləri ilə bağlı heç bir məlumat verilməyib.
Qanuntv.az xəbər portalının rəhbəri Bəxtiyar Vəliyev Sabir oğlu vəziyyəti yerində öyrənmək üçün bələdiyyəyə yaxınlaşsa da, sədrin müavini müsahibəsində bildirib ki, zibil yığmaq bələdiyyənin işi deyil və bu iş Xızı Rayon Mənzil-Kommunal İstehsalat Birliyinə aiddir. Müavinin sözlərinə görə, tullantıların yığılmasına mart ayında başlanması nəzərdə tutulub.
Lakin bu cavabsızlıq sakinlərin gündəlik həyatını iflic edib. İnsanlar zibillərin içində “itib batmaq” təhlükəsi ilə üz-üzədirlər. Uşaqlar və yaşlılar üçün vəziyyət xüsusilə həyati risk daşıyır. Şuraabad kəndindəki bu vəziyyət bələdiyyə sədrinin məsuliyyətsizliyini, kommunal qurumların passivliyini və yerli idarəetmənin vətəndaş qarşısında kobud səmərəsizliyini açıq şəkildə göstərir.
Sakinlər artıq səssiz qalmayacaqlarını bildirir, bələdiyyə sədrindən və müvafiq kommunal qurumlardan dərhal tədbir görməsini tələb edirlər. Zibil yığınlarının arasında yaşamaq yalnız həyat keyfiyyətinin deyil, həm də insan hüquqlarının kobud şəkildə pozulması deməkdir.
Çağırış:
Ramin Musayev və aidiyyatı qurumlar dərhal hərəkətə keçməli, Şuraabad kəndində zibillərin təcili yığılmasını təmin etməli və sakinlərlə ünsiyyət qurmalıdır. Sakinlərin şikayətləri göstərir ki, bələdiyyənin səhlənkarlığı artıq qəbulolunmazdır və məsələyə dərhal müdaxilə edilməlidir.
Qanuntv.az
Bəxtiyar Vəliyev.
