Bakının şimal istiqamətində yerləşən qəsəbələri şəhər mərkəzi ilə birləşdirəcək "Mehdiabad - 28 May" tramvay xəttinin çəkilməsi planlaşdırılır. Layihə Dövlət Proqramında prioritet kimi yer alıb və paytaxtda ictimai nəqliyyatın inkişafı, avtomobil asılılığının azalması məqsədini daşıyır. Yeni xətt metro və dəmiryolu ilə inteqrasiya ediləcək və gündəlik minlərlə avtomobil səfərinin azalmasına töhfə verəcək.

Nəqliyyat məsələləri üzrə ekspert Yasin Mustafayev bildirib ki, xətt Abşeron yarımadasının şimalından başlayaraq Mehdiabad, Məmmədli və Binəqədidən keçməklə "28 May" stansiyasına çatacaq: "Bu istiqamətdə metro və dəmiryolu yoxdur, avtobuslar isə müxtəlif marşrutlarda hərəkət edir. Yeni tramvay xətti sərnişindaşımaya ciddi töhfə verəcək və tıxacların azalmasına kömək edəcək".

Ekspert Adil Nəbiyev isə tramvayın şəhərdə ictimai nəqliyyatın cəlbediciliyini artıracağını, sabit marşrut üzrə hərəkət edərək sərnişin üçün daha rahat və proqnozlaşdırılan səyahət imkanı yaradacağını qeyd edib. O, tramvayın ekoloji cəhətdən təmiz, səs-küyün az və böyük sərnişin tutumuna malik olduğunu vurğulayıb: "Tramvay metronu əvəz etmir, onu tamamlayır və qidalandırıcı rol oynayır. Şəhərətrafı qəsəbələrdən mərkəzə yönələn axının bir hissəsini üzərinə götürsə, avtobusların və avtomobillərin sayı azalacaq və sistem nəfəs alacaq".

A.Nəbiyev tramvayın real fayda verməsi üçün xətt boyunca böyük yaşayış massivləri, universitetlər, biznes mərkəzləri və nəqliyyat qovşaqlarını əhatə etməsinin vacib olduğunu əlavə edib: "Metro stansiyaları, avtovağzal və əsas avtobus xətləri ilə kəsişmə nöqtələri düzgün seçilərsə, tramvay vahid nəqliyyat sisteminin effektiv hissəsinə çevriləcək".