Beyləqan Rayon Su Meliorasiya Sistemləri İdarəsində baş verənlər ciddi narahatlıq doğurur. İddialara görə, idarənin rəhbəri Zahid Sadıqov vəzifə öhdəliklərini faktiki olaraq bir kənara qoyaraq bütün qərarvermə səlahiyyətini öz katibəsinə həvalə edib.
Məlumata əsasən, sözügedən katibə nəinki vətəndaşları qəbul etmir, hətta idarəyə müraciət edən insanlara açıq şəkildə “qərarları mən verirəm” deyərək dövlət qurumunun fəaliyyət prinsiplərini kobud şəkildə pozur. Bu isə həm dövlət qulluğu etikasına, həm də vətəndaş məmnunluğunun təmin olunması prinsiplərinə açıq hörmətsizlik kimi qiymətləndirilir.
Ən ciddi məqam isə odur ki, idarə rəhbəri Zahid Sadıqovun özü də vətəndaşları qəbul etmir və “məşğuldur” adı altında insanları qapıdan geri qaytarır. Dövlət tərəfindən vətəndaşlara xidmət etmək üçün təyin olunan bir rəhbərin bu cür davranışı qəbuledilməzdir.
Bu hal yalnız idarədaxili intizamsızlıq deyil, eyni zamanda vəzifə səlahiyyətlərinin aşılması və vətəndaş hüquqlarının pozulması deməkdir. Dövlət qurumunda qərarların qeyri-rəsmi şəxs tərəfindən verilməsi hüquqi baxımdan da ciddi suallar yaradır.
Qanunvericiliyə görə, hər bir dövlət qurumunun rəhbəri vətəndaşların qəbulunu təşkil etməli, onların problemlərini dinləməli və qanun çərçivəsində həllinə çalışmalıdır. Lakin Beyləqanda baş verənlər bunun tam əksini göstərir.
Məsələ ilə bağlı aidiyyəti qurumların, xüsusilə Meliorasiya və Su Təsərrüfatı ASC-nin rəhbərliyinin və digər nəzarət orqanlarının təcili araşdırma aparması zəruridir. Əks halda bu cür özbaşınalıq halları digər qurumlar üçün də təhlükəli presedent yarada bilər.
Vətəndaşların dövlət qurumlarına olan inamı məhz belə hallara görə sarsılır. Bu cür yanaşma nə idarəçilikdir, nə də dövlətə xidmət. Bu, sadəcə məsuliyyətsizlik və vəzifədən sui-istifadənin bariz nümunəsidir.
