Kəlbəcər rayonunun Başlıbel kəndində ermənilər tərəfindən azərbaycanlı mülki əhaliyə qarşı törədilmiş qırğından 33 il ötür.
Qanuntv.az xəbər verir ki, 1993-cü ilin aprelində Kəlbəcər rayonunun işğalı zamanı 2 minə yaxın əhalisi olan Başlıbel kəndi ağır humanitar faciə ilə üzləşib.
Həmin günlərdə 73 nəfər kənd sakini evlərini tərk edə bilməyib və mühasirə şəraitində qalıb.
Aprelin 2-də mühasirədən çıxmağa çalışan sakinlərə hücum edilib, nəticədə 9 nəfər qətlə yetirilib, 5 nəfər girov götürülüb. Hadisədən sonra 62 nəfər dağlıq ərazilərə çəkilərək kahalarda gizlənməyə məcbur olub.
Aprelin 18-də isə onların gizləndiyi yerlər aşkar edilərək yeni hücum həyata keçirilib. Nəticədə daha 18 nəfər öldürülüb, 14 nəfər isə girov götürülüb. Bir nəfər isə itkin düşüb.
Sağ qalan 30 nəfər uzun müddət – 113 gün ərzində ağır mühasirə şəraitində yaşayıb və yalnız iyulun 17-də gecə saatlarında dağ yolları ilə təhlükəli şəkildə mühasirədən çıxmağa müvəffəq olub.
Faciə zamanı kəndin tarixi, mədəni və dini abidələri də dağıdılaraq məhv edilib. Başlıbel qətliamı Azərbaycanın mülki əhalisinə qarşı törədilmiş ən ağır hadisələrdən biri kimi yadda qalır.
