Şimali Kipr Türk Respublikasının Girnə sahillərində avqustun 30-da batan “Filo Jet” sərnişin gəmisində itkin düşən şəxslərin axtarışları davam etdirilir.
Axtarış-xilasetmə işləri zamanı daha bir şəxsin cəsədi aşkarlanıb. Bununla da gəmi qəzasında ölənlərin sayı 13-ə çatıb. Hazırda 15 nəfərin taleyi barədə məlumat yoxdur və onların axtarışları davam etdirilir.
Məlumata görə, bu barədə Şimali Kipr Türk Respublikasının Baş naziri Ünal Üstel keçirdiyi mətbuat konfransında açıqlama verib.
Qeyd edək ki, ötən gün də bir nəfərin cəsədi tapılmışdı. Bundan əvvəl ölənlərin sayı 12 nəfər təşkil edirdi.
Batan gəminin qalıqlarının Girnə sahillərində təxminən 554 metr dərinlikdə yerləşdiyi bildirilir.
Xatırladaq ki, Girnə limanı ilə Mersinin Taşucu limanı arasında sərnişin daşımaları həyata keçirən “Filo Jet” yüksək sürətli sərnişin gəmisi avqustun 30-da günorta saatlarında Girnədən yola düşüb. Gəmi yola çıxdıqdan qısa müddət sonra onun ön hissəsindən göyərtəyə su dolmağa başlayıb.
Gəmi Girnə limanına qayıtmağa çalışarkən aşıb və nəticədə ağır qəza baş verib.
Hadisə zamanı gəminin göyərtəsində Azərbaycan vətəndaşları Valeh Hümmətov və Rəşad İbrahimovun da olduğu bildirilib. Onlar qəza zamanı xilas ediliblər.
Məlumata görə, Valeh Hümmətov və Rəşad İbrahimov, eləcə də gəminin kapitanı və digər ekipaj üzvləri hadisə ilə bağlı aparılan istintaq çərçivəsində saxlanılıb və məhkəmə qarşısına çıxarılıblar.
Qəzanın səbəblərinin müəyyənləşdirilməsi və hadisənin bütün hallarının araşdırılması istiqamətində istintaq tədbirləri davam etdirilir.
