Nepalda baş verən dağıdıcı daşqının fəsadları ağır olaraq qalır.
Qanuntv.az xəbər verir ki, avqustun 29-da Nepalın Çitvan rayonunda hakimiyyət orqanları daşqından sonra kimliyi müəyyən edilə bilməyən 229 meyitin dəfninə başlayıb.
Məlumata görə, fəlakət zonasından ümumilikdə 233 meyit çıxarılıb. Onlardan yalnız dördünün kimliyi müəyyən edilib.
Çay sahillərindən çıxarılan və müxtəlif müəssisələrdə saxlanılan meyitlər və insan qalıqları ciddi şəkildə çürüdüyündən vizual identifikasiya mümkün deyil. Səhiyyə ekspertləri qalıqların daha çox çürüməsinin və yaranan kəskin qoxunun infeksiya və xəstəliklərin yayılması riskini artıra biləcəyini bildiriblər.
Dəfn edilməzdən əvvəl bütün meyitlərdən DNT nümunələri götürüləcək. Hər bir meyitə polad lövhəyə həkk olunmuş xüsusi identifikasiya nömrəsi verilib. Bu nömrələr gələcəkdə DNT uyğunluğu təsdiqləndikdən sonra qohumların qalıqları eksqumasiya etməsinə imkan verəcək.
Bununla yanaşı, Nepal hökuməti axtarış-xilasetmə işlərinin davam etdirilməsi üçün qonşu ölkələrdən xüsusi və ixtisaslaşmış yardım istəyib. Hindistandan tunellərdə xilasetmə işləri aparmaq üçün 11 nəfərlik xüsusi texniki kəşfiyyat qrupu göndərilib. Çindən isə tunellərdə xilasetmə qrupunun gəlməsi gözlənilir.
Nepalın təbii fəlakətlərlə mübarizə agentliyinin məlumatına görə, ölkədə təbii fəlakət nəticəsində ölənlərin sayı 669-a çatıb. Çin hakimiyyətinin ciddi nəzarətində olan Tibetdə ölümü təsdiqlənən 7 nəfər də nəzərə alındıqda, ölənlərin ümumi sayı 675 nəfər təşkil edib.
İtkin düşənlərin sayının isə təxminən 3 min nəfərə çatdığı bildirilir. Onlardan 2 426-sı Nepalda, 554-ü isə Tibetdədir.
Alimlərin ilkin araşdırmalarına əsasən, daşqına, ehtimal ki, 5,2 bal gücündə zəlzələdən sonra qopmuş nəhəng buzlaq parçası səbəb olub. Bildirilir ki, buzlaq parçası çayın qarşısını müvəqqəti olaraq kəsib.
Qanuntv.az
