Heydər Əliyev Fondunun vitse-prezidenti Leyla Əliyeva Özbəkistanın Səmərqənd şəhərində “Uşaqların rifahına investisiya” Ümumdünya Sammiti çərçivəsində keçirilən Uşaq Onkologiyası üzrə II Beynəlxalq Konqresin açılış mərasimində iştirak edib.
Qanuntv.az xəbər verir ki, “Sağalmaqdan həyat keyfiyyətinə doğru” şüarı altında təşkil olunan tədbirdə çıxış edən Leyla Əliyeva konqresin yüksək səviyyədə təşkilinə görə təşəkkürünü bildirib, uşaqlarda onkoloji xəstəliklərlə mübarizədə beynəlxalq əməkdaşlığın vacibliyini vurğulayıb.
O qeyd edib ki, hər bir uşaq hörmətə, qayğıya və dolğun həyat yaşamaq imkanına layiqdir. Onkoloji xəstəliklərin müalicəsində əldə edilən mühüm nailiyyətlərə baxmayaraq, uşaqların və onların ailələrinin ümidini qorumaq üçün beynəlxalq səviyyədə birgə səylərin davam etdirilməsi zəruridir.
Leyla Əliyeva Azərbaycanda da uşaq onkologiyasının diqqət mərkəzində saxlanıldığını bildirib. O, 2012-ci ilin martında Milli Onkologiya Mərkəzinin nəzdində regionun ilk uşaq onkoloji klinikasının açıldığını xatırladıb.
Heydər Əliyev Fondunun vitse-prezidenti uşaq xərçəngi ilə mübarizə sahəsində mütəxəssislərin və təşkilatların səylərini birləşdirən təşəbbüslərin əhəmiyyətinə toxunaraq, müvafiq koalisiyanın yaradılmasını bu istiqamətdə mühüm addım kimi dəyərləndirib. O, Azərbaycanda onkoloji xəstəliklərdən əziyyət çəkən uşaqlara tibbi yardımın dövlət tərəfindən maliyyələşdirildiyini, xəstələrin və ailələrinin dəstəklənməsinin vacibliyini diqqətə çatdırıb.
Çıxışı zamanı sağlamlığın yalnız fiziki vəziyyətlə məhdudlaşmadığını vurğulayan Leyla Əliyeva emosional durumun, stressin və ətraf mühitin insan sağlamlığına təsirlərinin də dərindən öyrənilməli olduğunu bildirib. O, xüsusilə uşaqların ailə mühitinə və valideynlərinin emosional vəziyyətinə həssas yanaşdıqlarını qeyd edərək, müalicə prosesində psixoloji dəstəyin əhəmiyyətini önə çəkib.
Leyla Əliyeva vurğulayıb ki, uşaqlara göstərilən tibbi yardım onların həyat keyfiyyətinin yüksəldilməsi, sevgi, hörmət və anlayışla əhatə olunması ilə tamamlanmalıdır. Onun sözlərinə görə, əsas məqsəd yalnız uşaqların sağalmasına nail olmaq deyil, həm də onların dolğun və keyfiyyətli həyat sürmələri üçün şərait yaratmaqdır.
Qeyd edək ki, konqresin açılış mərasimində Özbəkistan Prezident Administrasiyasında səhiyyə islahatları üzrə rəhbər müavini Tamila Əliyeva, Qazaxıstanın səhiyyə naziri Akmaral Alnazarova və Qırğızıstanın səhiyyə naziri Damirbek Osmonov da çıxış ediblər.
[img]https://qanuntv.az/uploads/posts/2026-10/1792644794_img_202[img]https://qanuntv.az/uploads/posts/2026-10/1792644745_img_20261022_085010_332.jpg[/img]
61022_085010_599.jpg[/img]
