Madriddə yerləşən Pons Fondunda MAMA “Ana təbiət” beynəlxalq incəsənət sərgisinin açılış mərasimi keçirilib.
Tədbirdə Heydər Əliyev Fondunun vitse-prezidenti Leyla Əliyeva, Arzu Əliyeva, İspaniyada akkreditə olunmuş diplomatik korpusun nümayəndələri, incəsənət xadimləri və yerli ictimaiyyətin təmsilçiləri iştirak ediblər.
Heydər Əliyev Fondunun vitse-prezidenti, IDEA İctimai Birliyinin təsisçisi Leyla Əliyevanın ideya müəllifi olduğu MAMA “Ana təbiət” layihəsi müxtəlif ölkə və mədəniyyətləri təmsil edən rəssamları bir araya gətirir. Sərginin əsas məqsədi insan və təbiət arasındakı əlaqəyə, ətraf mühitin qorunmasının vacibliyinə diqqət çəkməkdir.
Layihə ilk dəfə 2024-cü ildə COP29 çərçivəsində Bakıda, Heydər Əliyev Mərkəzində təqdim olunub. Daha sonra beynəlxalq layihəyə çevrilən sərgi Manama, Roma, London, Tbilisi, Berlin, Tirana, Cenevrə və Riqada nümayiş etdirilib.
Bu dəfə MAMA “Ana təbiət” sərgisi Heydər Əliyev Fondunun və Azərbaycanın İspaniyadakı səfirliyinin birgə təşkilatçılığı ilə Madrid şəhərində təqdim olunur.
Açılış mərasimində Azərbaycanın İspaniyadakı səfiri Ramiz Həsənov çıxış edərək layihənin incəsənət və bəşəriyyət arasındakı əlaqəni araşdıran mühüm beynəlxalq təşəbbüs olduğunu bildirib. O, sərginin müasir dövrün ekoloji çağırışlarına diqqət çəkdiyini vurğulayıb və Leyla Əliyevaya layihənin Madriddə keçirilməsinə verdiyi töhfəyə görə təşəkkürünü ifadə edib.
İspaniya Xarici İşlər, Avropa İttifaqı və Əməkdaşlıq Nazirliyinin nümayəndəsi Lui Fonseka Sançez isə İspaniyanın incəsənət, yaradıcılıq və mədəniyyət sahəsində zəngin ənənələrə malik olduğunu qeyd edib. O, Azərbaycanla bu istiqamətdə əməkdaşlığın yeni imkanlar yaratdığını vurğulayıb.
Leyla Əliyeva çıxışında MAMA “Ana təbiət” layihəsinin əhəmiyyətindən danışaraq sərginin ilk dəfə COP29 çərçivəsində Bakıda təqdim edildiyini xatırladıb. O bildirib ki, layihə daha sonra müxtəlif ölkələrdə nümayiş etdirilərək təbiətin, ətraf mühitin və bəşəriyyətin ümumi gələcəyinin qorunması ilə bağlı mühüm mesajları çatdırıb.
“Təbiət bizim anamızdır. O, bizə torpaq, su və hava bəxş edir. Lakin bütün bunlara baxmayaraq, biz insanlar təbiətin bəxş etdiyi bu nemətlərə zərər verməkdə davam edirik. Bu sərgi daha yaxşı gələcəyə doğru atılan növbəti addımdır”, – deyə Leyla Əliyeva bildirib.
Sərgi sentyabrın 9-dan 18-dək ziyarətçilər üçün açıq olacaq.
Ekspozisiyada Azərbaycan, İspaniya, İtaliya, Latviya, Ukrayna, Gürcüstan, Birləşmiş Krallıq, Almaniya və digər ölkələrdən olan tanınmış müasir rəssamların əsərləri nümayiş etdirilir.
Qanuntv.az
