Rusiya Prezidenti Vladimir Putinin “Sibirin gücü 2” qaz kəməri layihəsinin adını dəyişdirərək “Baykalın gücü” adlandırması Çində müzakirələrə səbəb olub.
Çin mediasında yayılan məlumatlarda bu addımın Pekinə yönəlmiş siyasi mesaj ola biləcəyi ehtimal edilir.
Məlumata görə, layihənin adının dəyişdirilməsi qərarı Putinin Çin Prezidenti Si Cinpinlə görüşündən sonra açıqlanıb. Tərəflər görüş zamanı Rusiya-Çin münasibətləri, enerji əməkdaşlığı və beynəlxalq gündəmlə bağlı məsələləri müzakirə ediblər.
Rusiyanın energetika naziri Sergey Tsivilyov Şərq İqtisadi Forumunda bildirib ki, “Sibirin gücü 2” layihəsinin “Baykalın gücü” adlandırılması məhz prezidentin təşəbbüsü olub. Bununla belə, qaz kəmərinin texniki göstəricilərinin və marşrutunun dəyişdirilmədiyi qeyd edilib.
Çinli analitiklər isə ad dəyişikliyinin mümkün siyasi səbəblərini müzakirə edirlər. Onların fikrincə, Moskva bununla enerji layihəsinin yalnız Çin bazarına yönəlmədiyini və Rusiyanın öz daxili enerji ehtiyaclarının da prioritet olduğunu nümayiş etdirmək istəyə bilər.
Bununla yanaşı, Kremlin layihənin adının dəyişdirilməsinin səbəbi ilə bağlı rəsmi açıqlama vermədiyi bildirilir. Bu səbəbdən Çin mediasında səsləndirilən “gizli mesaj” versiyası hələlik yalnız ehtimal olaraq qalır.
Layihənin texniki parametrləri və marşrutunda dəyişiklik edilməməsi isə ad dəyişikliyinin daha çox siyasi və ya simvolik xarakter daşıdığı barədə müzakirələri artırıb.
