Avqustun 31-də Qırğızıstanın paytaxtı Bişkek şəhərində Azərbaycan Respublikasının Prezidenti İlham Əliyev ilə İran İslam Respublikasının Prezidenti Məsud Pezeşkian arasında görüş keçirilib.
Qanuntv.az xəbər verir ki, görüş zamanı Azərbaycan-İran münasibətlərinin hazırkı vəziyyəti və gələcək inkişaf perspektivləri ətrafında geniş fikir mübadiləsi aparılıb.
Məsud Pezeşkian Prezident İlham Əliyevlə əvvəlki görüşlərini və telefon danışıqlarını məmnunluqla xatırladıb. İran Prezidenti ölkəsinin üzləşdiyi çətin vəziyyətlə əlaqədar Azərbaycan dövlətinin nümayiş etdirdiyi mövqeyi və dəstəyi yüksək qiymətləndirib.
O, Prezident İlham Əliyevin başsağlığı verməsini, həmçinin Azərbaycanın İran xalqına göstərdiyi humanitar yardımı xüsusi qeyd edərək, bütün bunlara görə bir daha təşəkkürünü bildirib.
Məsud Pezeşkian Azərbaycan və İran arasında əlaqələrin inkişaf etdirilməsi üçün geniş imkanların mövcud olduğunu deyib. İran Prezidenti ölkəsinin Azərbaycanla bütün sahələrdə əməkdaşlığı daha da genişləndirməkdə maraqlı olduğunu vurğulayıb.
O, iki ölkə arasında münasibətlərin qardaşlıq və dostluq xarakteri daşıdığını bildirərək, İranın bütün qonşu dövlətlərlə yaxşı münasibətlər qurmaq niyyətində olduğunu qeyd edib.
Prezident İlham Əliyev də öz növbəsində İranın üzləşdiyi hazırkı şəraitdə Azərbaycanın göstərdiyi dəstəyin qardaşlıq nümunəsi olduğunu vurğulayıb.
Dövlət başçısı Azərbaycanın İranla bağlı yaranmış vəziyyətin sülh və danışıqlar yolu ilə həllinin tərəfdarı olduğunu bildirib.
Görüşdə Azərbaycan və İran arasında əməkdaşlığın müxtəlif istiqamətlərdə inkişaf perspektivləri barədə də fikir mübadiləsi aparılıb.
