İran Prezidenti Məsud Pezeşkianın Bişkekdə Azərbaycan Prezidenti İlham Əliyevlə görüşü zamanı Azərbaycan dilində danışması İranda sosial şəbəkələrin farsdilli seqmentində müzakirələrə səbəb olub.

Qanuntv.az xəbər verir ki, bu barədə “Azad İran” “Telegram” kanalı məlumat yayıb.

Məlumata görə, “X” platformasında Pezeşkianın görüş zamanı türk dilindən istifadə etməsi ilə bağlı müxtəlif fikirlər səsləndirilib. Bəzi farsdilli istifadəçilər İran prezidentini tənqid edərək onun vəzifəsindən uzaqlaşdırılmasını tələb edən paylaşımlar ediblər.

“Armor” adlı istifadəçi görüşdən görüntülər paylaşaraq Pezeşkianın beynəlxalq görüşdə İranı təmsil etdiyi üçün fars dilində danışmalı olduğunu iddia edib.

“Cənab Pezeşkian, beynəlxalq görüşdə İranın nümayəndəsi qismində türk dilində danışmaqla səhv edirsiniz! İranın rəsmi dili fars dilidir. Hətta ali lider ərəb dilini mükəmməl bilməsinə baxmayaraq, ərəb ölkələrinin nümayəndələri ilə görüşlər zamanı fars dilində danışırdı. Türk dilində danışmaq lazım deyildi!” – deyə istifadəçi yazıb.

Qeyd edək ki, Azərbaycan Prezidenti İlham Əliyev və İran Prezidenti Məsud Pezeşkian avqustun 31-də Qırğızıstanın paytaxtı Bişkekdə görüşüblər. Görüş zamanı Azərbaycan-İran münasibətlərinin inkişaf perspektivləri və əməkdaşlığın müxtəlif istiqamətləri müzakirə olunub.