Oktyabrın 14-də Azərbaycan Respublikasının Prezidenti İlham Əliyevin İsrail Dövlətinin Prezidenti İsxak Hersoq ilə görüşü keçirilib.

Qanuntv.az AZƏRTAC-a istinadən xəbər verir ki, görüş zamanı Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyi, təşkilat çərçivəsində əməkdaşlığın genişləndirilməsi, eləcə də Azərbaycan-İsrail münasibətləri müzakirə olunub.

İsrail Prezidenti İsxak Hersoq Azərbaycanı AQEM-ə sədrliyi münasibətilə təbrik edib. O, Azərbaycanın 2026–2028-ci illərdə də təşkilata sədrliyini davam etdirməsini ölkəmizə göstərilən yüksək etimadın göstəricisi kimi qiymətləndirərək bundan məmnunluğunu ifadə edib.

İsxak Hersoq Azərbaycanın sədrliyi dövründə AQEM çərçivəsində praktiki əməkdaşlığın genişləndirilməsi və etimad quruculuğu tədbirlərinin gücləndirilməsi istiqamətində görülən işləri yüksək qiymətləndirib.

Prezident İlham Əliyev Azərbaycanın sədrliyinə verilən qiymətə görə təşəkkürünü bildirib. Dövlət başçısı ölkəmizin AQEM-ə üzv dövlətlər arasında qarşılıqlı etimadın möhkəmləndirilməsi və praktiki əməkdaşlığın inkişaf etdirilməsi istiqamətində səylərini davam etdirdiyini vurğulayıb.

Görüşdə Azərbaycan ilə İsrail arasında ikitərəfli münasibətlərin müxtəlif aspektləri, həmçinin beynəlxalq və regional gündəlikdə duran məsələlər ətrafında fikir mübadiləsi aparılıb.

Qanuntv.az