Şəhid Mixail Həmidovun ailəsində bu il ikiqat sevinc yaşanıb.
Şəhidin qızı Mədinə Həmidova 536 balla Bakı Dövlət Universitetinin Beynəlxalq münasibətlər və iqtisadiyyat fakültəsinə qəbul olaraq bakalavr tələbəsi adını qazanıb. Şəhidin həyat yoldaşı Qiymət Həmidova isə 38 yaşında magistraturaya qəbul olaraq illər sonra təhsilini davam etdirmək imkanı əldə edib.
Beləliklə, ana və qız eyni ildə tələbə adını qazanaraq ailələri üçün həm qürur, həm də duyğusal anlarla yadda qalan bir hadisəyə imza atıblar.
Qanuntv.az xəbər verir ki, bu barədə AzEdu.az şəhidin ailə üzvləri ilə söhbət apararaq onların təəssüratlarını öyrənib.
Türkiyə Dəyanət Vəqfi Bakı Türk Liseyinin məzunu olan Mədinə Həmidova III ixtisas qrupu üzrə 536 bal toplayıb. O, Bakı Dövlət Universitetinin Beynəlxalq münasibətlər və iqtisadiyyat fakültəsinə qəbul olunub.
Mədinə Həmidova uşaqlıqdan səfir olmaq arzusunda olduğunu bildirib:
«“Uşaqlıq arzum səfir olmaq idi. Elə Beynəlxalq münasibətlər ixtisasına da qəbul oldum, bununla da arzuma bir addım daha yaxınlaşdım”.»
O qeyd edib ki, qəbul nəticəsini ilk olaraq anası ilə birlikdə öyrənib və sevincini onunla bölüşüb.
Mədinənin sözlərinə görə, atası ona hər zaman “nə olursan ol, onu layiqincə et” deyib:
«“Onun üçün əslində nə olduğumun çox da önəmi yox idi. Sadəcə, bacardığımı görmək istəyirdi”.»
Gənc tələbə gələcəkdə bakalavr təhsilini başa vurduqdan sonra magistratura üçün Avropaya getməyi və diplomatiya sahəsində inkişaf etməyi planlaşdırdığını bildirib.
Ailədə digər böyük sevinc isə Qiymət Həmidovanın magistraturaya qəbul olmasıdır. Şəhidin həyat yoldaşı bildirib ki, həm qızının bakalavr pilləsinə, həm də özünün magistraturaya qəbul olması onlar üçün xüsusi əhəmiyyət daşıyır:
«“Bu, mənim üçün çox xüsusi və unudulmaz bir hissdir. Əslində, ikimiz də bir-birimiz üçün motivasiya olduq. Mən qızımın sevincini yaşadım, o da mənim uğuruma sevindi”.»
Qiymət Həmidova təhsilini davam etdirmək arzusunun uzun illərdir olduğunu, lakin iş, ailə və həyat yoldaşının şəhidliyindən sonra üzərinə düşən məsuliyyətlər səbəbindən bu istəyini təxirə saldığını deyib.
Şəhid həyat yoldaşının xatirəsinin ailəsi üçün hər zaman qürur mənbəyi olduğunu vurğulayan Qiymət Həmidova övladlarının uğurları ilə onun adını yaşatmaq istədiyini bildirib:
«“Mən bir ana olaraq ən böyük arzularımdan birini onun adını və xatirəsini övladlarımın uğurları ilə yaşatmaq hesab edirəm. İstəyirəm ki, Mədinənin, Yusifin və Mələyin hər bir uğurlarında atasının adı da çəkilsin və onunla necə fəxr etdiyimizi hər zaman göstərək”.»
O qeyd edib ki, ailəsi Mixail Həmidovun şərəfli adını bundan sonra da başıuca daşıyacaq.
Qanuntv.az
