Uqandadakı Toro krallığının ali hökmdarı IV Rukirabazaiya Oyo Nyimba Kabamba İguru Rukidi 34 yaşında vəfat edib.
Qanuntv.az xəbər verir ki, bu barədə BBC məlumat yayıb.
IV Oyo Rukidi dünyanın ən gənc hakim monarxı kimi tanınıb. O, bu xüsusiyyətinə görə 2025-ci ildə “Ginnesin Rekordlar Kitabı”na daxil edilib.
Kral atasının ölümündən sonra, 1995-ci ildə cəmi 3,5 yaşında taxta çıxıb və Toro krallığının 13-cü monarxı olub. O, yetkinlik yaşına çatana qədər regentlik vəzifəsini anası həyata keçirib.
Kral Oyo təhsilini Böyük Britaniyada alıb, Vinçester Universitetində biznes idarəçiliyi üzrə təhsil görüb. Onun rəhbərlik etdiyi Toro krallığında 2 milyondan çox insanın yaşadığı bildirilir.
Oyo, həmçinin BMT-nin səfiri kimi fəaliyyət göstərib, HİV/QİÇS-lə mübarizə və ətraf mühitin qorunması ilə bağlı layihələrdə iştirak edib.
Monarxın ölümünün rəsmi səbəbi açıqlanmayıb. Uqanda hökumətinin nümayəndələri isə onun xərçəng xəstəliyindən əziyyət çəkdiyini və ABŞ-də müalicə olunduğunu bildiriblər. Kralın məhz ABŞ-də vəfat etdiyi qeyd olunub.
Subay olan kralın taxt-tac üçün varisinin olduğu bildirilir. Uqanda Baş naziri Kelvin Akiiki bildirib ki, varis olan şahzadənin adı Toro krallığının adət-ənənələrinə uyğun olaraq daha sonra açıqlanacaq.
