Heydər Əliyev Fondunun prezidenti Mehriban Əliyevanın təşəbbüsü ilə avqustun 26-da xüsusi qayğıya ehtiyacı olan uşaqlar üçün geniş əyləncə tədbiri keçirilib.
Qanuntv.az xəbər verir ki, tədbirə Vətənimizin ərazi bütövlüyünün bərpası uğrunda mübarizədə şəhid olmuş qəhrəmanların övladları, valideyn himayəsindən məhrum olan və internat məktəblərində tərbiyə alan uşaqlar, sağlamlıq imkanları məhdud və xüsusi qayğıya ehtiyacı olan uşaqlar dəvət olunublar.
Tədbirin əsas məqsədi uşaqlara xoş və unudulmaz gün yaşatmaq, onların asudə vaxtlarının səmərəli və maraqlı təşkilinə şərait yaratmaq, hər bir uşağın diqqət və qayğı ilə əhatə olunduğunu hiss etdirmək olub.
Xüsusi avtobuslarla istirahət məkanına gətirilən uşaqlar gün ərzində müxtəlif əyləncəli proqramlarda və maraqlı oyunlarda iştirak ediblər. Onlar yaradıcılıq və ustad dərslərinə qatılıb, öz bacarıqlarını nümayiş etdirib, rəqs edib və həmyaşıdları ilə birlikdə xoş vaxt keçiriblər.
Dəniz kənarında, yay ab-havasında təşkil olunan tədbirdə uşaqlar hovuzda da əylənərək günün sevincini doyunca yaşayıblar. İştirakçılar üçün nahar süfrəsi hazırlanıb, ad günləri həmin tarixə təsadüf edən uşaqlar isə özəl günlərini həmyaşıdları ilə birlikdə qeyd ediblər.
Tədbirin sonunda uşaqlara bu gözəl gündən xatirə olaraq Heydər Əliyev Fondunun hədiyyələri təqdim olunub.
Tədbirdə iştirak edən uşaqlar təşkil olunan şənlikdən böyük məmnunluq duyduqlarını bildiriblər. Onlar həmyaşıdları ilə birlikdə oyun oynamaq, rəqs etmək, hovuzda əylənmək və yeni dostlar qazanmaq imkanının onlar üçün xüsusi əhəmiyyət daşıdığını qeyd ediblər.
Uşaqlar Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanı doğum günü münasibətilə təbrik edib, onlara göstərilən diqqət və qayğıya görə təşəkkürlərini çatdırıblar.
Qeyd edək ki, Heydər Əliyev Fondunun fəaliyyətində həssas kateqoriyaya aid uşaqların diqqət və qayğı ilə əhatə olunması istiqaməti xüsusi yer tutur. Fond valideyn himayəsindən məhrum və xüsusi qayğıya ehtiyacı olan uşaqlar, eləcə də şəhidlərin övladları üçün mütəmadi olaraq müxtəlif sosial və əyləncə tədbirləri təşkil edir.
Bu cür təşəbbüslər uşaqların asudə vaxtlarının səmərəli keçirilməsinə, onların cəmiyyətə inteqrasiyasına və mənəvi-psixoloji baxımdan dəstəklənməsinə xidmət edir.
