Azərbaycan Ordusunun Baş Qərargah rəisi, müdafiə nazirinin birinci müavini general-polkovnik Kərim Vəliyev ölkəmizdə səfərdə olan Pakistan İslam Respublikası Müdafiə Qüvvələri Qərargahının Xarici Hərbi Əməkdaşlıq Baş İdarəsinin rəisi general-mayor Məhəmməd İmran Xan Babarın rəhbərlik etdiyi nümayəndə heyəti ilə görüşüb.
Qanuntv.az xəbər verir ki, bu barədə Azərbaycan Respublikasının Müdafiə Nazirliyi məlumat yayıb.
Görüş zamanı Azərbaycan ilə Pakistan arasında münasibətlərin möhkəm dostluq, qardaşlıq və qarşılıqlı etimad prinsiplərinə əsaslandığı vurğulanıb. General-polkovnik Kərim Vəliyev iki ölkə arasında strateji tərəfdaşlığın mövcud səviyyəsindən məmnunluğunu ifadə edərək, müdafiə və təhlükəsizlik sahəsində əməkdaşlığın davamlı şəkildə inkişaf etdiyini qeyd edib.
Baş Qərargah rəisi Azərbaycan və Pakistanın müdafiə qurumlarının rəhbər heyətləri arasında mütəmadi keçirilən görüşlərin hərbi əlaqələrin daha da genişləndirilməsində mühüm rol oynadığını bildirib. Onun sözlərinə görə, qarşılıqlı səfərlər və müzakirələr mövcud əməkdaşlığın yeni istiqamətlər üzrə inkişafına əlavə imkanlar yaradır.
Pakistan nümayəndə heyətinin rəhbəri general-mayor Məhəmməd İmran Xan Babar isə göstərilən səmimi qəbul və yüksək qonaqpərvərliyə görə minnətdarlığını bildirib. O, Azərbaycan və Pakistan arasında mövcud hərbi əməkdaşlığın əhəmiyyətini vurğulayaraq, keçirilən görüşlərin ikitərəfli əlaqələrin daha da möhkəmlənməsinə müsbət töhfə verdiyini qeyd edib.
Görüşdə iki ölkənin silahlı qüvvələri arasında əməkdaşlığın müxtəlif istiqamətləri ətrafında geniş fikir mübadiləsi aparılıb. Tərəflər hərbi təhsil, hərbi-texniki əməkdaşlıq, birgə hərbi təlimlərin təşkili və qarşılıqlı maraq doğuran digər məsələləri müzakirə ediblər.
Aparılan müzakirələr Azərbaycan-Pakistan hərbi əlaqələrinin mövcud yüksək səviyyəsinin qorunması və gələcəkdə yeni istiqamətlər üzrə daha da inkişaf etdirilməsi baxımından əhəmiyyətli olub.
