Avqustun 20-də Tovuz rayon sakini, 24 yaşlı Lalə Quliyeva beş aylıq hamiləliyini sonlandırdıqdan sonra baş verən güclü qanaxma nəticəsində həyatını itirib.
Qanuntv.az xəbər verir ki, qadın ağır vəziyyətdə “Vitam Med Hospital”a müraciət edib, daha sonra təcili tibbi yardım avtomobili ilə Sabunçu Tibb Mərkəzinə aparılıb. TƏBİB-in məlumatına görə, qadın Sabunçu Tibb Mərkəzinə ölü vəziyyətdə çatdırılıb.
Hadisənin diqqət çəkən məqamlarından biri isə hamiləliyin hansı tibb müəssisəsində və kim tərəfindən sonlandırılması ilə bağlı məlumatın hələlik açıqlanmamasıdır.
Məlumata görə, mərhum “Vitam Med Hospital”dan Sabunçu Tibb Mərkəzinə göndərilib. Hospitalın baş həkimi Baku TV-yə açıqlamasında bildirib ki, abort onların klinikasında aparılmayıb.
Baş həkimin sözlərinə görə, qadın avqustun 20-də saat 21:04-də klinikaya güclü qanaxma şikayəti ilə müraciət edib. Onun sözlərinə görə, xəstənin hamilə olması barədə əvvəlcədən məlumat olmayıb və qadının üzərində hər hansı tibbi sənəd də olmayıb.
Xəstəyə ilkin tibbi yardım göstərildiyi, damar yolunun açıldığı, oksigen verildiyi və daha sonra stasionara yerləşdirildiyi bildirilib. Ardınca təcili tibbi yardım çağırılıb və qadın Sabunçu Tibb Mərkəzinə hospitalizasiya olunub.
Hospitalın baş həkimi qeyd edib ki, xəstə təcili tibbi yardım avtomobili ilə xəstəxanaya çatdırılarkən sağ olub və yolda həyatını itirməyib.
Hazırda əsas suallardan biri hamiləliyin sonlandırılmasının harada və hansı şəraitdə həyata keçirilməsi ilə bağlıdır. Qadının abortu ev şəraitində, yoxsa başqa bir tibb müəssisəsində etdirdiyi barədə hələlik rəsmi məlumat yoxdur.
Mütəxəssislər bildirirlər ki, hamiləliyin dördüncü-altıncı aylarında sonlandırılması daha yüksək risk daşıyan tibbi müdaxilələrdən hesab olunur. Bu mərhələdə güclü qanaxma və digər ciddi ağırlaşmalar yarana bilər.
Ginekoloq Rəşad Sultanın sözlərinə görə, dölün inkişafında ciddi qüsur aşkarlandığı müəyyən hallarda hamiləliyin sonlandırılması mümkündür. Belə hallarda hamilə qadının razılığı və tibbi konsiliumun qərarı tələb olunur.
Hadisənin bütün təfərrüatlarının, hamiləliyin harada və kim tərəfindən sonlandırılmasının, ölümə səbəb olan qanaxmanın hansı şəraitdə baş verdiyinin araşdırma nəticəsində müəyyənləşdirilməsi gözlənilir.
