Almaniyanın Essen şəhərində türkiyəli Diyar Gündüz maskalı və silahlı şəxslərin köməyi ilə mühafizəçilərin əlindən qaçırılıb.
Qanuntv.az xəbər verir ki, hadisə oktyabrın 14-də baş verib. Məlumata görə, hücum edən şəxslər əvvəlcə mühafizəçiləri qandallayıb, daha sonra Diyar Gündüzün qandallarını açaraq onun qaçmasına şərait yaradıblar.
Hadisə yerinin girişində partlayıcıya bənzəyən qumbara maketinin də qoyulduğu bildirilir. Gündüz və ona kömək edən şəxslər əvvəlcədən hazırladıqları elektrikli skuterlərlə ərazidən müxtəlif istiqamətlərə uzaqlaşıblar.
Məlumata əsasən, iki məhkəmə işi üzrə ümumilikdə 17 il həbs cəzasına məhkum edilmiş Gündüzün barəsindəki hökmlər hələ qüvvəyə minməyib. Hadisədən sonra o və qaçışda ona kömək etdiyi bildirilən iki nəfər Avropada axtarışa verilib.
Hadisə ilə bağlı araşdırmanın davam etdiyi bildirilir.
