Dövlət Təhlükəsizliyi Xidmətinin (DTX) keçirdiyi kompleks əməliyyat-axtarış tədbirləri nəticəsində Bakıda müxtəlif hazırlıq kursları, tələbə yataqxanaları və uşaq bağçaları adı altında fəaliyyət göstərərək qanunla müəyyən edilmiş qaydada razılaşdırılmadan dini ayinlər keçirən şəxslər cinayət və inzibati məsuliyyətə cəlb ediliblər.
Qanuntv.az xəbər verir ki, xaricdə dini təhsil almış Azərbaycan vətəndaşlarından ibarət qruplaşmanın özünü “Süleyman camaatının Bakı məntəqəsi üzrə rəhbəri” kimi təqdim edən Səid Mehman oğlu Mikayılovun rəhbərliyi ilə fəaliyyət göstərdiyi bildirilir.
Hazırda Səid Mikayılovun təqsirləndirilməsinə dair cinayət işinə Bakı şəhəri Binəqədi Rayon Məhkəməsində baxılır.
Məhkəmə prosesində bir sıra şahidlər ifadə verərək yataqxana və tədris mərkəzlərindəki fəaliyyət barədə məlumat açıqlayıblar.
Şahid İbrahim Teymurov bildirib ki, Səid Mikayılovdan sonra “Nəsimi” tələbə yataqxanasına rəhbərlik edib. Onun sözlərinə görə, əvvəlcə yataqxanada nəzarətçi və mühafizəçi işləyib, daha sonra tələbələrə Quran dərsləri keçməyə başlayıb.
Şahid qeyd edib ki, tələbələrdən aylıq 150 manat ödəniş alınıb. Bu məbləğin qarşılığında tələbələr yataqxana və gündə üç dəfə yeməklə təmin ediliblər. Onun sözlərinə görə, yataqxanada Quran, əxlaq, təmizlik və dini ayinlərlə bağlı dərslər də keçirilib.
Digər şahid İsmayıl Sərvərli isə Səid Mikayılovun təklifi ilə Bakıxanov qəsəbəsində tədris mərkəzi açdığını bildirib. O qeyd edib ki, şagirdlərdən aylıq 150 manat alınıb, onların gecələməsi və üç dəfə qidalanması təmin edilib.
Şahidin sözlərinə görə, mərkəzdə ədəbiyyat, riyaziyyat və ingilis dili üzrə hazırlıq dərsləri keçirilib. Eyni zamanda, bəzi işçilərin əmək müqaviləsi olmadan çalışdırıldığı və bunun vergi öhdəliklərindən yayınmaq məqsədi daşıdığı bildirilib.
Məhkəmədə ifadə verən digər şahid Elton Abdullayev isə Binəqədidə yerləşən tələbə yataqxanasında müdir vəzifəsində çalışdığını deyib.
O bildirib ki, yataqxanada təxminən 17-18 tələbə qalıb və hər birindən aylıq 150 manat ödəniş alınıb. Şahidin sözlərinə görə, yataqxanada tələbələrə ərəb əlifbası və Qurani-Kərim öyrədilib, namaz qılınması qaydaları izah olunub və dini ayinlər birgə icra edilib.
Elton Abdullayev dini tədris aparan şəxslərin dini təhsillərinin olduğunu, lakin bunun üçün müvafiq icazələrinin olmadığını bildirib.
Şahidlərin ifadələrində yataqxanalarda sədəqə və nəzir qutularının yerləşdirildiyi, həmin qutulara tələbələr və onların valideynləri tərəfindən pul atıldığı da qeyd olunub.
Xatırladaq ki, Azərbaycanda sözügedən tədbirlər 2026-cı ilin yanvarında başlayıb. Qruplaşmaya aid olduğu bildirilən dərsxanələr və uşaq bağçaları bağlanılıb.
2026-cı ilin avqustunda isə Türkiyədə “Süleyman camaatı” dini icmasının rəhbəri Alihan Kuriş və bir neçə icma üzvünün cinayətkar dəstəyə rəhbərlik, dələduzluq, vergidən yayınma və çirkli pulların yuyulması ittihamları ilə həbs edilməsi barədə məlumatlar yayılıb.
Məhkəmə prosesi digər şahidlərin ifadələri ilə sentyabrın 30-da davam etdiriləcək.
