Şimali Kipr sahillərində batan yüksək sürətli sərnişin gəmisinin qəzası ilə bağlı yeni təfərrüatlar ortaya çıxıb.
Qanuntv.az xəbər verir ki, yerli “Kıbrıs Postası” qəzetinin istintaqa istinadən yaydığı məlumata görə, “Filo Jet” şirkətinə məxsus gəmi Girnə limanını artıq zədələnmiş vəziyyətdə tərk edib.
İstintaqın ilkin qənaətinə əsasən, gəmidə zədə olsa da, onun dənizə çıxmasına icazə verilib. Zərərçəkənlərin ifadələri və hadisə zamanı çəkilmiş video görüntülərin də gəminin limanı zədələnmiş halda tərk etdiyini təsdiqlədiyi bildirilir.
Məlumata görə, gəminin kapitanının təhlükəni gördükdən sonra istiqaməti dəyişərək aşağı sürətlə Girnə limanına qayıtmaq imkanı olub. Lakin kapitanın bu addımı atmadığı və hərəkəti davam etdirdiyi qeyd edilir.
İstintaq materiallarında bildirilir ki, gəmiyə su dolmağa başladığı anda kapitan dərhal sürəti azaldaraq limana geri dönsəydi, faciənin qarşısını almaq mümkün ola bilərdi. Lakin gəminin hərəkətini davam etdirməsi nəticədə vəziyyətin daha da ağırlaşmasına səbəb olub.
Digər tərəfdən, hadisə ilə bağlı cinayət işi üzrə doqquz nəfərin həbs müddəti daha səkkiz gün uzadılıb. Həbs edilənlər arasında gəminin kapitanının da olduğu bildirilir.
Məhkəməyə təqdim olunan məlumatlara əsasən, kapitanın gəmi idarə etmək üçün istifadə etdiyi vəsiqəni Hondurasdan 3,5 min ABŞ dollarına aldığı və daha sonra həmin sənədi Yunanıstanda qeydiyyatdan keçirdiyi iddia olunur.
Qeyd edək ki, avqustun 30-da göyərtəsində təxminən 260 sərnişin və 8 heyət üzvü olan yüksək sürətli sərnişin gəmisi Kipr sahillərindən təxminən 2,5 kilometr məsafədə dənizdə batıb.
Faciə nəticəsində 9 nəfər həyatını itirib, 19 nəfərin isə hələ də itkin düşdüyü bildirilir.
Hadisə ilə bağlı araşdırma davam etdirilir.
