Azərbaycan Respublikasının Prezidenti İlham Əliyev “Sabah” futbol klubuna maliyyə dəstəyi göstərilməsi haqqında Sərəncam imzalayıb.
Qanuntv.az President.az-a istinadən xəbər verir ki, Sərəncama əsasən, UEFA Çempionlar Liqasının liqa mərhələsinə vəsiqə qazanması ilə əlaqədar Azərbaycan Respublikasının 2026-cı il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan “Sabah” futbol klubuna 5 milyon manat ayrılıb.
Sərəncamla ayrılan vəsaitin maliyyələşdirilməsini təmin etmək Azərbaycan Respublikasının Maliyyə Nazirliyinə həvalə olunub.
Sərəncamdan irəli gələn məsələlərin həlli isə Azərbaycan Respublikasının Nazirlər Kabinetinə tapşırılıb.
Qeyd edək ki, dövlət başçısının bu qərarı “Sabah” futbol klubunun beynəlxalq arenada qazandığı mühüm uğurun qiymətləndirilməsi və Azərbaycan futboluna göstərilən diqqət və dəstəyin növbəti nümunəsi kimi diqqət çəkir.
